कैलारीके लौसामे होरी विशेष खक्रेहरा कार्यक्रम
पहुरा समाचारदाता
धनगढी, १ चैत्र । कैलाली जिल्लाके कैलारी गाउँपालिका वडा नं. ८ स्थित लौसा गाउँमे होरी विशेष खक्रेहरा कार्यक्रम निम्जल बा ।
लौसा गाउँ समाज होरी विशेष खक्रेहरा कार्यक्रम आयोजक मुल कमिटीके आयोजना ओ कैलारी गाउँपालिका–८ नम्बर वडा कार्यालयके आर्थिक सहयोगमे उ कार्यक्रम हुइल हो ।
कठरिया भाषा, संस्कृति ओ पहिचानहे उजागर करैना उदेश्यके साथ आयोजना हुइल कार्यक्रमके वडका पहुना कैलारी गाउँपालिकाके अध्यक्ष राजसमझ चौधरी ओ विशिष्ट पहुना गाउँपालिका गाउँपालिका उपाध्यक्ष भगवतीकुमारी चौधरी, वडा नम्बर ८ के वडा अध्यक्ष तारामल कठरिया, थारु कल्याणकारिणी सभाके केन्द्रीय सदस्य रामचरण चौधरी, नेपाली काँग्रेस कैलालीके उपसभापति खेम डगौरा, नेपाली काँग्रेस कैलारीके उपसभापति सोनु चौधरी, नेपाल कठरिया समाजके निवर्तमान केन्द्रीय गया प्रसाद कठरिया रहल रहिट ।
कार्यक्रममे बोल्टी वडका पहुना तथा गाउँपालिका अध्यक्ष राजसमझ चौधरी होरी विशेष खक्रेहरा कार्यक्रम कला संरक्षणमे टेवा पुगल बटैलै । उहाँ कहलै, हमार थेन टमान मेरिक कला, संस्कृृति, भेषभुसा बा । उ हेरैटी गैल बा । अब्बे ओकर संरक्षण करे नइसेक्लेसे हमार पहिचानफे नइरहिजाई ।’ कला, संस्कृतिहे पुनःजागरणके लाग होरी विशेष खक्रेहरा कार्यक्रमहे निरन्तरता डेना आग्रह करटी ओकर लाग स्थानीय सरकारसे सदैव सहयोग रहना प्रतिवद्धता जनैलै ।
ओस्टेक विशिष्ट पहुना कैलारी गाउँपालिकाके उपाध्यक्ष भगवतीकुमारी चौधरी पुर्खानके सीप यूवा पुस्ताहे सिखाई पर्ना बटैली । उहाँ कहली ‘हमार पहिरन हेराइटा, हमार बोली भाषाफे हेरैटी जाइटा उहीसे जोगैना आवश्यक बा ।’
कार्यक्रम लौसा गाउँ समाज होरी विशेष खक्रेहरा कार्यक्रम आयोजक मुल कमिटीके संयोजक शनि कठरियाके अध्यक्षतामे हुइल रहे । कार्यक्रममे समुदायके फगुई (होली) ओ खखडेहराके बारेमे जानकारी करैटी टमान मेरिक होरी नाँच लगायत और नाँच, गीतबाँस प्रस्तुत हुइल लौटन कठरिया बटैलै ।
उहाँ कार्यक्रममे स्थानीय कठरिया कलाकारहुकनके समेत विशेष प्रस्तुती रहल रहे । कलेसे कठरिया थारु समुदायके चर्चित गायक रामकुमार कठरिया, महालोक गायक मनिराम चौधरीलगायत कलाकारहुकनके प्रस्तुती हुइल रहे ।
