क्षमता विकास तथा सचेतना तालिम निम्जल

पहुरा समाचारदाता
हसुलिया, ८ चैत । कैलालीके कैलारी गाउँपालिका वडा नम्बर ६ संचालन हुइल क्षमता विकास तथा सचेतना तालिम निम्जल बा ।

कैलारी गाउँपालिकाके आयोजना तथा हेलो इन्टरनेशनल प्रालि नेपालगञ्ज बाँके सहजीकरणहे गैल फागुन २६ गतेसे सुरु हुइल उ तालिम बुधके रोज कैलारी गाउँपालिकाके उपाध्यक्ष भगवतीकुमारी चौधरीके अध्यक्षतामे हुइल रहे । समापन कार्यक्रममे बोल्टी उहाँ तालिम लेसेकलपाछे सीपके सदुपयोग कैना आग्रह करली ।

उहाँ कहली, ‘यी कार्यक्रम उपाध्यक्ष लक्षित बजेटसे कैगिल हो । महिला डिडीबहिनीयहुकन नेतृत्व विकासके लाग बोले सेक्ना क्षमता बृद्धिके लाग, योजना तर्जुमा, बजेटबारे जानकारी डेहक कार्यक्रम नानल हो ।’उपाध्यक्ष लक्षित बजेटसे सुत्केरी डाईनहे पोषण उपहार कार्यक्रमफे संचालन हुइल उहाँ बटैली ।

कार्यक्रममे कैलारी गाउँपालिका नम्बर ६ के वडा अध्यक्ष प्रेम बहादुर चौधरी, वडा नम्बर ६ के वडा सचिव अन्नत कँडेल, हेलो इन्टरनेशनल प्रालि नेपालगञ्ज बाँकेके कार्यकारी निर्देशक विरेन्द्र चौधरीलगायत मन्तव्य व्यक्त करल रहिट । कार्यक्रमके संचालन दिपेन्द्र चौधरी करले रहिट ।

क्षमता विकास तथा सचेतना तालिमके मुख्य सहजकर्ता दिपेन्द्र चौधरी ओ लखराम चौधरी रहल रहिट । तालिममे लिडर सीप, सेल्फलिडर सीप, योजना तर्जुमा, लैङिक समानता तथा सामाजिक समावेशीकरण, प्रश्न कैना शैलीबारे प्रशिक्षण डेहल रहे ।

क्षमता विकास तथा सचेतना तालिम कैलारी गाउँपालिकाके १, २, ५, ६, ८ ओ ९ नम्बर वडामे संचालन कैगिल रहे । सक्कु वडामे मिलाके १८९ जनहनहे तालिम डेहल बा ।