निःशुल्क आँखी जाँच शिविरमे ७५७ जाने सेवा लेलैं

पहुरा समाचारदाता
हसुलिया, ८ चैत । कैलालीके कैलारी गाउँपालिका हसुलियामे बुधके रोज निःशुल्क आँखी जाँच शिविर हुइल बा ।

निःशुल्क आँखी जाँच शिविरके कैलारी गाउँपालिकाके उपाध्यक्ष भगवतीकुमारी चौधरी डाक्टरके टोलीहुकन स्वागतसहिट आँखी जाँच कराके उदघाटन करल रहिट ।

रोटरी अष्ट्रेलिया ओ रोटरी क्लब अफ सेन्ट्रल बाँकेके संयुक्त आयोजना तथा कैलारी गाउँपालिकाके सहकार्यमे हुइल आँखी जाँच शिविर ७ सय ५७ जाने सेवा लेले बटै । गाउँपालिकाके सभाहल (साझा हल) मे हुइल शिविरमे ३९६ महिला ओ ३६१ जाने पुरुष आँखी जाँच कराइल कैलारी गाउँपालिकाके स्वास्थ्य शाखा प्रमुख नरेश चौधरी जानकारी डेलै ।

उहाँ आँखी जाँच शिविरमे आवश्यकता अनुसार विरामीहे निःशुल्क चश्मा वितरण ओ शिविरमे छनौट हुइल जलविन्दु तथा मोतियाविन्दुके विरामी एवं आँखाीमे मासु पलाइल विरामीहुकनके गेटा आँखा अस्पतालमे निःशुल्क अप्रेशनके लाग सिफारिस करल बटैलै ।