कैलाली बहुमुखी क्याम्पसके स्ववियू सभापतिमे अनेरास्ववियुके जोशी निर्वाचित

पहुरा समाचारदाता
धनगढी, ९ चैत । सुदूरपश्चिम प्रदेशके सबसे भारी क्याम्पस कैलाली बहुमुखी क्याम्पसमे नेकपा एमाले निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन अनेरास्ववियुके यमराज जोशी सभापतिमे विजयी हुइल बटै ।

प्रतिद्वन्द्वी नेपाल विद्यार्थी संघ (नेविसंघ)के हरिस खत्रीहे पराजित करटी विजयी हुइल हुइट । ७ सय २२ मतसहित जोशी विजयी हुईबेर उहाँक प्रतिद्वन्द्वी खत्री ७०५ मत प्राप्त करले बटै ।

ओस्टेक सचिवमे भर नेविसंघके सन्तोश पन्त ८५६ मतसहित विजयी हुइल बटै । प्रतिद्वन्द्वी अनेरास्ववियूके रमेश बोहराहे पराजित करटी पन्त विजयी हुइल हुइट । बोहरा ५८३ मत नन्लै । कोषाध्यक्षमेफे नेविसंघके अम्बिका चौधरी विजयी हुइल बटी । प्रतिद्वन्द्वी अखिल (क्रान्तिकारी) दिनेशराज जोशीहे पराजित करल हुइट । चौधरी ७६४ मत पाईबेर जोशी भर ५७२ मत पाइल हुइट ।

४ हजार ३ सय ढेर मतदाता रहल यी क्याम्पसमे २ हजार ३ सय ६८ मत खसल रहे । सभापतिमे निर्वाचित हुइल लगटे जोशी समग्र विद्यार्थी हकहितके बिषयमे आवाज उठैना बटैलै ।
कैलाली बहुमुखी क्याम्पसमे यिहीसे आघे २०५७ सालमे सभापतिमे डेजि पाण्डे जिटल रहिट । २०६२ मे यज्ञराज ढुङगना ओ २०७३ मे चुनामणि भट्ट निर्वाचित हुइल रहिट ।