भलमन्सा, गुरुवा ओ सोरहनीयनहे तालिम
पहुरा समाचारदाता
धनगढी, ११ चैत । कैलालीके जोशीपुरमे भलमन्सा, चिराकी, गुरुवा ओ सोरनियाहुकनहे एक दिने तालिम डेहल बा ।
थारु कल्याणकारिणी सभा जिल्ला कार्यसमिति कैलालीके आयोजना तथा आन्तरिक मामिला तथा कानून मन्त्रालय सुदुरपश्चिम प्रदेश धनगढी कैलालीके सहकार्यमे तालिम डेहल हो । जोशीपुर गाउँपालिका अध्यक्ष चित्रबहादुर चौधरी तथा विशिष्ट पहुना उपाध्यक्ष रेखादेवी कठरिया रहल रहिट ।
एक दिने तालिममे समसामयिक सांस्कृतिक व्यवस्था तथा नेतृत्व विकासके विषयमे थाकसके केन्द्रीय सदस्य एवं समाजशास्त्र विज्ञ ईन्दु चौधरी प्रशिक्षण डेहल रहिट । मानवअधिकार सम्बन्धी राष्ट्रिय मानव अधिकार आयोगके हरिप्रसाद ज्ञवाली, ऐन कानून सम्बन्धी अधिवक्ता जोहारीलाल चौधरी ओ भलमन्सा, चिराकी, गुरुवा, सोरनीया सम्बन्धी थारु नागरिक समाजके संयोजक दिलबहादुर चौधरी प्रशिक्षण डेहल रहिट ।
कार्यक्रममे सहभागी रहल भलमन्सा संयोजक शक्ताराम चौधरी भलमन्सा, चिराकी, सोरहनीया ओ गुरुवाहुकनके एकता रहल बटैटी वहाँ भलमन्साहुकनके केल ऐन बनलमे दुख व्यक्त करलै । उहाँ कहलै, ‘भलमन्सा, चिराकी, सोरहनीया ओ गुरुवा सक्कुहुनके ऐन बन्न आवश्यक बा ।’
ओस्टेक सहभागीसे गुरुवा सुवर्ण चौधरी, सोरहनीयसे मुसुरीदेवी डंगौरा ओ चिराकीसे चक्रदेवी चौधरीसमेत एक्यवद्धता जनैटी ऐन बनाई पर्नामे जोड डेहल रहिट ।
कार्यक्रममे थाकसके कार्यवाहक सभापति माधव चौधरी अभिनफे भलमन्सा, चिराकी, गुरुवा, चौकीदारहे कानूनी व्यवस्था सम्बन्धी सचेतना मूलक तालिम डेना आवश्यक रहल बटैलै । स्थानीयस्तरमे नेतृत्व कैना अइनके न्यायीक कार्य सम्पादनमे चुनौती रहल बटैटी उहाँ यैसिन मेरिक तालिम पालिकास्तरसे डेना आवश्यक रहल बटैलै । तालिम उदघाटन कार्यक्रमके संचालन देशराज चौधरी करले रहिट ।
