ट्राफिक राजश्व संकलनमे कमी

सचेतना कार्यक्रममे जोर डेहेबेर सवारी चालक सचेत हुइटी

पहुरा समाचारदाता
धनगढी, ११ चैत । जिल्ला ट्राफिक प्रहरी कार्यालय कैलाली गैल बरसके तुल्नामे राजश्व संकलनमे कमी आइल बटैले बा ।

शनिच्चरके रोज धनगढीमे पत्रकारहुकनसे कैगिल परिचयात्मक कार्यक्रममे उ जानकारी डेहल हो । जिल्ला ट्राफिक प्रहरी कार्यालय कैलालीके प्रमुख विरेन्द्र जोहारी चालु आर्थिक बर्ष २०७९÷०८० के फागुन मसान्तसम २८ हजार ४७७ ठो कार्वाहीमे १ करोड ६१ लाख २६ हजार राजश्व संकलन हुइल बटैलै ।

ट्राफिक प्रहरी कार्यालय दुई बरस पहिले आर्थिक बर्ष २०७७÷०७८ सालमे ७९ हजार ८९ ठो कार्वाही करेबेर ४ करोड ५७ लाख ६७ हजार राजश्व संकलन करल उहाँ जनैलै । ओस्टेक गैल आर्थिक बर्ष २०७८÷०७९ सालमे ४२ हजार १ ठो कार्वाही करेबेर २ करोड ३३ लाख ७८ हजार पाँच सय रुप्या राजश्व संकलन करल ट्राफिक प्रहरी प्रमुख जोहारी बटैलै ।

उहाँ कहलै, ‘जिल्ला ट्राफिक प्रहरी कार्यालयसे सचेतनामुलक कार्यक्रमहे तिब्रता बनाइल कारण दुर्घटना हुइना संख्यामे कमी आइल बा । पहिले सवारी चालक अनुमतिपत्र विना सवारी चलैना संख्या अधिक रहे । सवारीके नविकरणफे करल नइभेटजाए । अब्बे लाइसेन्ससहित नविकरण करल भेटजाइठ ।’

जिल्ला ट्राफिक प्रहरी कार्यालय कैलालीसे आर्थिक बर्ष २०७८÷०७९ सालमे १ सय ३२ चो १५ हजार ५०७ जनहनहे सचेतना डेले बा । कलेसे चालु आर्थिक बर्ष २०७९÷०८० सालके फागुन मसन्तासम १ सय ६१ चो सचेतना कार्यक्रम करेबेर २७ हजार ४ सय ५३ जनहनके सहभागिता रहल उहाँ जनैलै । सचेतना कार्यक्रममे ट्राफिक नियमबारे सहजीकरण करल उहाँ बटैलै ।

ओस्टेक चालु आर्थिक बर्ष २०७९÷०८० सालके फागुन मसान्तसम ४३ जनहनके ज्यान गैल उहाँ बटैलै । यी बरस ९५ ठो सवारी दुर्घटना हुईबेर ८२ जाने गम्भीर घाहिल ओ ३७ जाने सामान्य घाहिल हुइल उहाँ बटैलै ।
आर्थिक बर्ष २०७८÷०७९ सालमे ७६ जाने ओ आर्थिक बर्ष २०७७÷०७८ सालमे ६९ जानेक ज्यान गैल जिल्ला ट्राफिक प्रहरी कार्यालय कैलालीके प्रमुख जोहारी बटैलै ।

ओस्टेक करके परिचयात्मक कार्यक्रममे संचारकर्मीनहे ट्राफिक नियमबारे जानकारी डेहल बा ।