भीम रावलके विरोधापाछे अछाममे एमालेके कार्यक्रम बिथोलगिल
पहुरा समाचारदाता
धनगढी,१३ चैत । एमालेके ग्रास रुट अभियान अन्तरगत अछाममे आयोजित कार्यक्रममे भीम रावलके विरोध करलपाछे कार्यक्रम बिथोलल बा ।
अछामके साँफेबगरमे नेकपा एमालेके उपाध्यक्ष बिष्णु पौडेल उपस्थित रहल कार्यक्रम बिथोलल हो । सोम्मार उपाध्यक्ष पौडेल, प्रदेश इन्चार्ज लेखराज भट्ट, सह इन्चार्ज कर्ण थापा, प्रदेश अध्यक्ष दामोदर भण्डारी लगायत उपस्थित रहल पार्टीके आन्तरिक कार्यक्रममे एमाले नेता भीम रावलके सन्दर्भमे कोई कुछ नइबोल्न सहमति विपरित एक नेतासे मन्तव्य व्यक्त हुइलपाछे रावल पक्षधर कार्यकर्ताहुक्रे नाराबाजी करटी कुर्सी प्रहार करले बटै । ओकरपाछे कार्यक्रम विथोलल रहे ।
कार्यक्रम सुरु हुइना आघे रावलके सन्दर्भमे कोईफे कुछ नइबोल्न समझदारी हुइल रहे । मने सल्लाहकार समिति सदस्य डडेलधुराके पदमराज जोशीसे भीम रावलके विरुद्ध बोललपाछे सहभागीहुक्रे नाराबाजी सहित कुर्सी प्रहारसमेत करले रहिट ।
साँफेबगर स्थित खाद्य गोदामके हलमे आयोजित उ कार्यक्रममे असामान्य अवस्था हुइलपाछे कार्यक्रम स्थगित हुइल रहे ।
लगातारके नाराबाजी ओ असमान्य अवस्था पाछे जोशीसे रावलके सन्दर्भमे अपने बोलल शब्द फिर्ता लेना कहलपाछे अवस्था सामान्य बनल रहे । दुनु पक्षबीच रावलके सन्दर्भमे कोई कुछ नइबोल्न सर्तमे करिब एक घण्टापाछे कार्यक्रम सुचारु हुइल अछामस्थित एक जाने एमाले नेता बटैलै ।
उपाध्यक्ष पौडेलफे भीम रावलके सन्दर्भमे बाट सुरु करे लागलपाछे फेरसे नाराबाजी सुरु हुइना अवस्था हुइलपाछे पौडेलसे रावलके नकारात्मक बाट नइकैना बटैले रहिट । भीम रावल भर दुईदिनसे प्रदेश राजधानी धनगढीमे रहल बटै ।
