जनता आविके तीन कोठे भवनके शिलान्यास

पहुरा समाचारदाता
हसुलिया, १४ चैत । कैलालीके कैलारी गाउँपालिका–१ मनाउँमे रहल जनता आधारभूत विद्यालयके तीन कोठे पक्की भवनके शिलान्यास कैगिल बा ।

विल्डअन नेपाल ओ कैलारी गाउँपालिकाके साझेदारीमे निर्माण हुइटी रहल उ भवनके शिलान्यास एक कार्यक्रमके विच कैगिल हो । कैलारी गाउँपालिकाके अध्यक्ष राजसमझ चौधरीके वडका पहुनामे हुइल कार्यक्रममे उहाँ उ नवनिर्मित भवनके शिलान्यास करले रहिट । भवन शिलान्यास कार्यक्रममे बोल्टी भवनके अभावमे पढाईमे समस्या नआए कहटी विल्डअन नेपाल ओ कैलारी गाउँपालिकाके साझेदारीमे निर्माण हुइटी रहल बटैलै । उहाँ कहलै, ‘ढेर जैसिक सामुदायिक विद्यालयके भवन जिर्ण अवस्थामे बा । जहाँ मर्मत हुई सेक्ना बा उ भवनके मर्मत कैना ओ जहाँ भवन अपुग बा कलेसे उ ठाउँमे लौव भवन निर्माणके काम आघे बह्राइल हो ।’

विद्यालय व्यवस्था समितिके अध्यक्ष कुक्करा चौधरीके अध्यक्षतामे हुइल कार्यक्रममे विद्यालयके प्रअ सुरेशचन्द्र महतो तीन कोठे पक्की भवन ओ दुई कोठे शौचालय बन्टी रहल बटैलै । भवन निर्माण सुरुसे १०६ दिनभिटरे सम्पन्न हुइना उहाँ जनैलै । विशिष्ट पहुना वडा नम्बर ५ के वडा अध्यक्ष विष्णुप्रसाद चौधरी, वडा–१ के कार्यवाहक अध्यक्ष तुल्सी प्रसाद चौधरी, नेपाली काँग्रेस कैलारी गाउँपालिकाके सभापति कृष्णप्रसाद चौधरी, हरिनगर, डम्मरा, मनाउँ, विसनपुरके मन्झाराके भल्मन्सा, टमान सामुदायिक वनके अध्यक्ष, आधारभूत मनाउँके प्रतिनिधि, विल्डअन नेपालके फिल्ड संयोजक राजकुमार चौधरी, इन्जिनियर मनोज कुमार चौधरी, पूर्व जनप्रतिनिधि, राजनीतिक दलके प्रतिनिधिलगायतके उपस्थिति रहल रहे । कार्यक्रममे डम्मराके सखिया नाँच, मनाउके होरी नाँच, छोट छोट लर्कनके स्वदेश गान नाँच प्रस्तुत कैगिल रहे । कार्यक्रमके संचालन शिक्षक जित प्रसाद चौधरी करले रहिट ।