वातावरण संरक्षण ओ वातावरणके अधिकार सम्बन्धी कार्यशाला निम्जल

पहुरा समाचारदाता
कञ्चनपुर, १६ चैत । कञ्चनपुर जिल्लाके बेलौरी नगरपालिकामे वातावरण संरक्षण ओ वातावरणके अधिकार सम्बन्धी कार्यशाला गोष्ठी बिफेक रोज निम्जल बा ।

बेलौरी नगरपालिका स्तरीय मानवअधिकार समुहसे अनौपचारिक क्षेत्र सेवा केन्द्र (इन्सेक) सुदुरपश्चिम प्रदेश कार्यालय धनगढीके सहयोगमे कार्यशाला गोष्ठी आयोजना करल रहे ।

कार्यशाला गोष्ठीमे मानवअधिकार समुह बेलौरीके उपाध्यक्ष पदम बहादुर शाह बेलौरी नगरपालिका वार्ड नं. १० मे रहल चिनी मिलसे उत्सर्जन हुइना दुर्गन्ध तथा फोहोरसे मानव स्वास्थ्यमे परटी रहल असरके कारण गम्भीर समस्या निम्टे सेक्नाप्रति सजग रहिके आवश्यक नीति निर्माण करके उ चिनी मिलके व्यवस्थापन कैना स्थानीय सरकारसंग आग्रह करलै ।

उहाँ टिनामे प्रयोग हुइटी रहल बिषादी ओ अन्नबाली भण्डारण करेबेर प्रयोग कैना बिषादीसे दैनिक रुपमे उपभोक्ताहुक्रे मन्द विष सेवन करटी रहल बाट उल्लेख करटी नेपालके खेतीयोग्य जमीनमे अस्टे करके रसायनिक मलके प्रयोग हुइटी जैना हो कलेसे अइना १५ बर्षमे नेपाली माटी कौनोफे उत्पादन नइडेना विचार रख्लै ।

बेलौरी नगरपालिकाके विपद व्यवस्थापन सम्पर्क व्यक्ती किशोर महरा नगरपालिकामे हालसमफे विपद व्यवस्थापन शाखा स्थापना नइहुइल ओरसे अपने सम्पादन करे पर्ना काम प्रभावकारी हुई नइसेकल बाट स्वीकार करटी वातावरण संरक्षणके लाग नगरपालिकासे वातावरण संरक्षण नीति निर्माण करके काम करटी रहल बटैलै ।

उहाँ नगरपालिका क्षेत्रमे स्थापना हुइल उद्योग, कल कारखानाके लग्गेक नागरिकहुक्रे आवास निर्माण कैना करल कारण समस्या उत्पन्न हुइटी रहल बटैलै ।

बेलौरी नगरपालिकामे घरनक्सा पास करके घर निर्माण करुइयाके संख्या एकदम न्यून रहल ओरसे के केहोर घर बनैटी बा नगरपालिकासे अनुगमन कैना समस्या हुइटी रहल बटैलै ।

बेलौरी नगरपालिका वार्ड नं. २ के जननिर्वाचित वडा सदस्य सावित्री सार्की इटा भट्टा लगायतके उद्योग संचालन कैना अनुमति डेहेबेर स्थलगत निरीक्षण कैना आवश्यक रहल विचार रख्लै ।

जनजागृती पुष्पलाल स्मृती माविके अभिभावक धनराज गिरी समुदायमे निर्माण हुइटी रहल सडकमे माटी दारके गाडी हक्टी रहल मने निर्माण कैना पक्षसे पानी नइदारेबेर धुुर उरके तमान टमान रोगके संक्रमण हुइटी रहल चिन्ता व्यक्त करलै ।
मानवअधिकार समुह बेलौरीके अध्यक्ष गोविन्द प्रसाद सापकोटा प्रत्येक नागरिकके घरस निकरना फोहोरहे सरना ओ नइसरना फुहरहे छुट्याके व्यवस्थापन करे सेक्लेसे केल वातावरणहे स्वच्छ बनैना कुछ हद सम सहयो हुइना कहटी अबके बदल्टी परिवेशमे नागरिकहुक्रे अधिकारसंगसंगै नागरिक कर्तव्यफे पालना कैना आग्रह करलै ।

कार्यक्रममे इन्सेक कञ्चनपुर जिल्ला सहजकर्ता कैलाश पनेरु राष्ट्रिय वातावरण नीति २०७६ प्रस्तुत करटी नीतिके कार्यान्वयनके अवस्थाके बारेमे सहजीकरण करलै ।