मन्त्रीमण्डल पुनर्गठन ओ विस्तार
काठमाडौँ,१७ चैत । प्रधानमन्त्री पुष्पकमल दाहाल ‘प्रचण्ड’ से मन्त्रीमण्डल पुनर्गठन करले बटै ।
प्रधानमन्त्री प्रचण्डसे शुकके सातौं चो मन्त्रीमण्डल पुनर्गठन ओ विस्तार करल हुइट । पुस १० गते प्रधानमन्त्री हुइल प्रचण्डसे आज मन्त्रीमण्डल विस्तार करलेसेफे पूर्णता भर डेहे नइसेक्लै । प्रचण्ड नेतृत्वके सरकारमे २ जाने उपप्रधानमन्त्री बनल बटै । सुरुमे एमालेके समर्थनमे प्रधानमन्त्री हुइल प्रचण्डसे राष्ट्रपति निर्वाचनपाछे गठबन्धन फेरके नेपाली कांग्रेससहितके गठबन्धनमे आइलपाछे शुकके मन्त्रीमण्डल पुनर्गठन ओ हेरफेर करल हुइट । यी आघे उपप्रधानसहित भौतिक मन्त्रालयके जिम्मेवारी पाइल माओवादी नेता नारायणकाजी श्रेष्ठसे गृहमन्त्रालयके जिम्मेवारी पैले बटै । ओस्टेक करके कांग्रेस नेता पूर्ण बहादुर खड्काफे उपप्रधानसहित रक्षा मन्त्रालयके जिम्मेवारी पैले बटै ।
नयाँ मन्त्रीहुकनके आजु शपथ ग्रहण हुइटी बा । पूनर्गठित मन्त्रीमण्डलमे नेपाली कांग्रेससे ४, एकीकृत समाजवादी २, जसपा १, लोसपा १ ओ नेपाल समाजवादी पार्टीसे १ मन्त्रालय पैले बटै । मने जनमतके खान खानेपानी मन्त्रीमे चित्त नइबुझलपाछे राजीनामा डेले बटै ।
पुर्नगठित मन्त्रीमण्डलमे कांग्रेसके पूर्णबहादुर खड्का उपप्रधानसहित रक्षा, नेकपा एकीकृत समाजवादीके डा. बेदुराम भुसाल कृषि तथा पशुपन्छी, जसपाके अशोक राई शिक्षा, लोसपाके शरदसिंह भण्डारी श्रम तथा रोजगार, कांग्रेसके डा. प्रकाशसरण महत अर्थ, नेसपाके महिन्द्र राययादव महिला बालबालिका, माओवादीके शक्ति बस्नेत ऊर्जा तथा जलश्रोत, एकीकृत समाजवादीके प्रकाश ज्वाला, भौतिक योजना, नागरिक उन्मुक्तीके रञ्जिता श्रेष्ठ भूमि व्यवस्था, कांग्रेसके रमेश रिजाल उद्योग ओ कांग्रेसके सिता गुरुङ सहरी विकास मन्त्रालयके जिम्मेवारी पैले बटै । माओवादीके चार मन्त्री पुराने मन्त्रालयके जिम्मेवारीमे रहल बटै । नारायणकाजी श्रेष्ठ भर भौतिकसे गृहमे पुगल बटै ।
प्रधानमन्त्री प्रचण्डसे ५ ठो मन्त्रालय भर अपनसंग धरले बटै । जेम्ने कानुन न्याय तथा संसदीय, परराष्ट्र, युवा तथा खेलकुद, वन तथा वातावरण ओ स्वास्थ्य मन्त्रालय प्रधानमन्त्री प्रचण्डसँगे रहल बा ।
