घोडाघोडीके हिउँदे अधिवेशन सुरु
पहुरा समाचारदाता
सुखड, १८ चैत । कैलाली घोडाघोडी नगरपालिकाके हिउँदे अधिवेशन शनिच्चरसे सुरु हुइल बा ।
आर्थिक वर्ष २०७९/२०८० सालके नगर सभा अधिवेशन (हिउँदे अधिवेशन) नगर प्रमुख खडकबहादुर रावतके सभाध्यक्षमे हुइल कार्यक्रमके उदघाटन प्रदेश सभाके सांसद खुसीराम चौधरी ‘भिमसेन’ करले रहिट । नगर सभामे सहभागी टमान वक्ताहुक्रे शुभकामना मन्तव्य समेत राखले रहिट ।
हिउँदे अधिवेशन उदघाटन कार्यक्रममे जिल्ला समन्वय समितिके सदस्य विर्खबहादुर बुढा, उपप्रमुख गुलियाकुमारी चौधरी, वडा नम्बर १ से १२ समके वडा अध्यक्ष, कार्यपालिका सदस्य, वडा सदस्य, प्रमुख प्रशासकीय अधिकृत दिपक कुमार आचार्य, टमान शाखाके प्रमुख, कर्मचारीहुक्रे, इलाका प्रहरी कार्यालय सुखडके प्रहरी नायव उपरीक्षक (डीएसपी) वीरेन्द्र वीर विश्वकर्मा, राजनीतिक दलके प्रतिनिधि लगायत पत्रकारहुकनके सहभागिता रहल रहे ।
१६ औँ नगर अधिवेशन बैठकमे विधेयक समितिके संयोजक तथा वडा नम्बर ४ के वडाध्यक्ष भरतकुमार शाहीसे ४ ठो विधेयकह पेस करले रहिट । विज्ञसंग विधेयकबारे छलफल कैना, टमान विषयगत समितिसंग परामर्श करके फेर नगर सभा बस्न नगर प्रवक्ता घनश्याम ओझा बटैलै । अइना नगर सभाके अधिवेशनसे चार ठो विधेयक पास कैना बटाइल बा ।
