बालविवाह न्यूनीकरण सडक नाटक प्रदर्शन
पहुरा समाचारदाता
कञ्चनपुर, १९ चैत । अनौपचारिक क्षेत्र सेवा केन्द्र (इन्सेक) से विद्यालयमे गठित बाल अधिकार चेतना समूह बेलौरी नगरपालिका– ६ के भीमदत्त चोकमे बालविवाह न्यूनिकरण सम्बन्धी सडक नाटक प्रदर्शन करले बा ।
बेलौरी नगरपालिका–२ गोकुलपुर स्थित लक्ष्मी माध्यमिक विद्यालय ओ वडा नम्बर ३ स्थित जनजागृती पुष्पलाल स्मृती माध्यमिक विद्यालयमे गठित बाल अधिकार चेतना समूहके संयुक्त टोलीसे बालबिबाहसे समाजमे परटी रहल असर ओ न्यूनिकरणमे सरोकारवालाहुकनके भूमिका विषयमे सडक नाटक प्रदर्शन करल हो ।
मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहसे सडक नाटक प्रदर्शन करले बा । सडक नाटक प्रदर्शनमे शिक्षक, अभिभावक, मानवअधिकार समुहके सदस्यलगायत उपस्थिति रहे ।
सडक नाटक प्रदर्शन कार्यक्रममे बालबालिकाहुक्रे बालबिबाहसे समाजमे परटी रहल नकरात्मक असर ओ रोकथामके लाग सरोकारवालाहुकनके भूमिका झल्कैना प्रयास करले रहिट । बालबालिकासे प्रदर्शन करल सडक नाटक हेरके भ्रम ओ संस्कारके नाउँमे लउण्डीनके छोट उमेरमे भोज कैना प्रचलन समाजमे व्याप्त रहल अवस्थामे यैसिन खाले नाटकसे जनचेतना जागृत कैना हुइल ओरसे बालबालिकाहुकनहे अभिन विषय बस्तुमे निखारके समुदायमे जनचेतना फैलैना आग्रह करल बा । १३ जाने पात्र रहल सडक नाटकमे बालबालिका, बिद्यालय, शिक्षक, वडाअध्यक्ष, भोज करुइया पुजारी, दुलाहा, दुलही, संघरीया, प्रहरी लगायतके बालबिबाह न्यूनिकरणमे हुई सेक्ना भूमिका झल्कना खालके कथा प्रस्तुत करल रहे ।
ओस्टेक अनौपचारिक क्षेत्र सेवा केन्द्र (इन्सेक) से बेलौरी नगरपालिका–२ गोकुलपुरस्थित लक्ष्मी माध्यमिक विद्यालय ओ वडा नम्बर ३ स्थित जनजागृती पुष्पलाल स्मृती माध्यमिक विद्यालयमे गठित बाल अधिकार चेतना समूहके संयुक्त टोलीसे लागु औषध दुव्र्यशनीसे समाजमे परल रहल असर ओ न्यूनिकरणमे सरोकारवालाहुकनके भुमिका विषयमे सडक नाटक तयार पारके बेलौरी नगरपालिका वार्ड नं. ४ के संबिधान चोकमे प्रदर्शन करले बा ।
मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहसे सडक नाटक प्रदर्शन करल हो । सडक नाटक प्रदर्शनमे शिक्षक, अभिभावक, मानवअधिकार समुहके सदस्यहुक्रे लगायत सयौंके संख्यामे स्थानयीहुकके उपस्थिति रहे ।
सडक नाटक प्रदर्शन कार्यक्रममे बालबालिकाहुक्रे लागुऔषध दुव्र्यशनीसे समाजमे परटी रहल नकरात्मक असर ओ रोकथामके लाग सरोकारवालाहुकनके भूमिका झल्कैना प्रयास करल रहिट ।
मानवअधिकार समुहके कोषाध्यक्ष विजयालक्ष्मी श्रेष्ठसे पछिल्का समयमे बेलौरी क्षेत्र लागुऔषध ओसार पसार तथा सेवन करुइयाके ट्रान्जीट प्वाईन्ट बन्टी जैटी रहल ओरसे यैसिन खाले नाटकमार्फत समाजमे सकरात्मक सन्देस प्रवाह करलमे वालअधिकार चेतना समुहहे धन्यवाद ज्ञापन करलै । ११ जाने पात्र रहल सडक नाटकमे बालबालिका, विद्यालय, शिक्षक, वडाअध्यक्ष, स्थानीय मदिरा व्यापारी, मदिरा सेवन करटी रहल संघरिया, प्रहरी लगायतके लागु औषध दुव्र्यशनी न्यूनिकरणमे हुई सेक्ना भूमिका झल्कना खालके कथा प्रस्तुत करल रहे ।
