थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०४ कुँवार २६४९, शनिच्चर ]
[ वि.सं ४ आश्विन २०८२, शनिबार ]
[ 20 Sep 2025, Saturday ]

प्रहरी सक्रियता बह्रल हो टे ?

पहुरा | २२ चैत्र २०७९, बुधबार
प्रहरी सक्रियता बह्रल हो टे ?

८ फरार प्रतिवादी ओ ६ दुर्व्यशनकर्ता पक्राउ

पहुरा समाचारदाता
धनगढी, २२ चैत ।
कैलाली जिल्लाके टमान ठाउँसे दुई दिनके अवधिमे टमान मुद्दा लागके फरार हुइल आठ जाने प्रतिवादी ओ ६ जाने लागु औषध दुर्व्यशनकर्ता पक्राउ परल बटै ।

पक्राउ परल आठ जाने फरार प्रतिवादीहुकनहे जिल्ला कैलाली अदालतमे दाखिला करल बा, कलेसे लागु औषध दुर्व्यशनकर्ताहुकनके अनुसन्धान सुरु करल बा ।

सुदूरपश्चिम प्रदेश प्रहरी कार्यालयके प्रमुखसे आइल निर्देशन अनुसार प्रहरीहुकनके सक्रियता बह्राइल जिल्ला प्रहरी कार्यालयके कैलालीके सहायक प्रवक्ता खगेन्द्र साउँद बटैलै ।

सुदूरपश्चिम प्रदेश प्रहरी कार्यालयके निमिति प्रदेश प्रहरी प्रमुखसे फरार प्रतिवादीनहे पक्रना ओ लागु औषध दुव्र्यसनी नियन्त्रणके लाग कडा रुपमे उत्रना निर्देशन आइल बा,’ सहायक प्रवक्ता साउद कहलै, ‘पहिलेफे नियमित रुपमे फरार प्रतिवादीनहे पक्रना ओ लागु औषध दुव्र्यसनी नियन्त्रण कैना करजैटी रहे । अब्बे यहाँके प्रहरी प्रमुख ओ प्रहरीहुकनहे कडा रुपमे प्रस्तुत हुइना निर्देशन आइलपाछे प्रहरी सक्रियता बह्राइल हो ।’

फरार प्रतिवादी पक्राउ कैना ओ लागु औषध दुव्र्यसनी न्यूनिकरणके लाग जनशक्ती बह्राइल हुइल उहाँ बटैलै ।

उहाँ कहलै, ‘जिल्ला अदालतसे आइल तथ्याङक अनुसार कैलाली जिल्लाभर करिब १७ सयके हराहारीमे फरार प्रतिवादी डेखल बटै । अदालतसे जरिवाना तोकल कतिपय जरिवाना तिरसेकल बटै । मने ओइनके लगत कट्टी करल नइहो ।’

प्रतिवादी एक ठो अदालतके फैसलापाछे ओ दुसर अनुसन्धानके क्रममे फेला नइपरके फरार रठै, उहाँ कहलै ।

सुदूरपश्चिम प्रदेश प्रहरी कार्यालय धनगढी कैलालीमे काज सरुवा हुके आइल प्रदेशके निमित्त प्रदेश प्रहरी प्रमुख प्रहरी बरिष्ठ उपरीक्षक भरत बहादुर बोहरा चैत १६ गते पदभर ग्रहण करल रहिट ।

तालुक नेपाल प्रहरी प्रधान कार्यालय, मानवश्रोत विकास विभाग, कर्मचारी प्रशासन शाखाके च.नं. ८६२१ यिहे चैत १३ गतेके पत्रादेशसे प्रदेशके निमित्त प्रदेश प्रहरी प्रमुख प्रहरी बरिष्ठ उपरीक्षक बोहरा विफेक रोज हाजिर हुके पदभार ग्रहण करले बटै ।

लागु औषध मुद्दामे सम्मानित कैलाली जिल्ला अदालतके मिति २०७७ चैत ११ गतेके फैसलासे ३ महिना २३ दिन कैद तोकल जिल्ला कैलाली धनगढी उप–महानगरपालिका वडा नं. १३ बैठना बर्ष २९ के सुशिल चौधरी ओ बर्ष ३० के बालगोबिन्द रानाहे प्रहरीसे मंगरके रोज पक्राउ करले बा । ओस्टेक वन मुद्दामे सम्मानित कैलाली जिल्ला अदालतके २०७६ अगहन ४ गतेके फैसलासे ५१ हजार ५४४ रुप्या जरिवाना तोकल जिल्ला कैलाली गौरीगंगा नगरपालिका वडा नं. ०३ बैठना बर्ष २३ के देशराज राजीहे पक्राउ करल जिल्ला प्रहरी कार्यालय कैलालीके सहायक प्रवक्ता साउद बटैलै ।

मंगरके रोज प्रहरी चौकी अमरावती कैलालीसे खटल प्रहरी टोली कैलाली जानकी गाउँपालिका वडा नं. ०९ पुर्वी खैरी फाँटा बैठना बर्ष २७ के रमेश माझीहे पक्राउ करले बा ।

२०७५ पुस ३० गते करिब सात बजे साँझके कैलाली जानकी गाउँपालिका वडा नं. ०९ पुर्वी खैरी फाँटा बैठना बर्ष २० के राजु सिंह समेतके ५ जाने बर्ष २१ के आकाश बिक ओ भतिजुवा बर्ष २७ के ललित बि.क. हे ज्यान मर्ना उद्देश्यसे धरियार हतियार प्रहार करके सख्त घाहिल बनाके उहेसे भागल रहिट ।

प्रहरी चौकी अमरावतीसे खटल प्रहरी टोलीसे हुकाने घरसे फेला पारके पक्राउ करके ईलाका प्रहरी कार्यालय टिकापुरमे धारके थप अनुसन्धान कार्य हुइटी रहल जनागिल बा ।

ओस्टेक करके यिहे गैल अँटवार टमान मुद्दा लागल चार जाने फरार प्रतिवादी पक्राउ परल रहिट । बन मुद्दाके सम्मानित जिल्ला अदालत कैलालीके २०७७ चैत १२ गतेके फैसलासे ३८ हजार ५४३ जरिवाना तोकल फरार प्रतिवादी कैलाली धनगढी उपमहानगरपालिका ४ बैठना बर्ष २८ के अरुणकुमार बुढामगर पक्राउ परल बटै ।

चोरी मुद्दामे जिल्ला अदालत कैलालीके २०७७ चैत ४ गतेके फैसलासे १ महिना ४ दिन कैद ओ २ हजार रुप्या जरिवाना तोकल फरार प्रतिवादी जिल्ला कैलाली धनगढी उप–महानगरपालिका १५ बैठना बर्ष २५ के पप्पु राना पक्राउ परल बटै ।

चोरी मुद्दामे अदालत कैलालीके २०७१ साउन १९ गतेके फैसलासे १ वर्ष १ महिना १४ दिन कैद तोकल धनगढी उप–महानगरपालिका १५ बैठना बर्ष २५ के फरार प्रतिवादी रामकुमार चौधरी पक्राउ परल प्रहरी जनैले बा ।

ओस्टेक सम्मानित जिल्ला बन्यजन्तु मुद्दामे अदालत कैलालीके २०७३ भदौ २६ गतेके फैसलासे ६ महिना कैद ओ २० हजार जरिवाना तोकल कैलाली गोदावरी नगरपालिका वडा न. ०४ बैठना बर्ष ५३ के फरार प्रतिवादी शेरबहादुर पुनमगरहे पक्राउ कैगिल बा ।

मंगरके रोज प्रहरी लागु औषध (खैरो हेरोईन) सहित ४ जनहनहे पक्राउ करले बा । पक्राउ परुइयामे जिल्ला कैलाली टिकापुर नगरपालिका वडा नं. ०७ सोनाफाँटा स्थित भारत जिल्ला लखिमपुर खिरी तिकुनिया बैठना बर्ष २० के सतिश रानासे ४ ग्राम ८८० मिलिग्राम लागु औषध (खैरो हेरोईन) बरामद कैगिल बा ।

जिल्ला कैलाली धनगढी उप–महानगरपालिका वडा नं. ०३ विशालनगर स्थित जिल्ला बाजुरा खप्तड छेडेदह गाउँपालिका वडा नं. ०४ घर हुके हाल जिल्ला कैलाली धनगढी उप–महानगरपालिका वडा नं. ०३ कोठा करके बैठना बर्ष ४० के आनन्द धामीके कोठासे ३ ग्राम ४०० मिलिग्राम लागु औषध (खैरो हेरोईन) बरामद करल बा । कैलाली धनगढी उपमहानगरपालिका वडा नं. ०२ तिल्केताल एरियामे बर्ष १९ के ईश्वर साउदके थेनसे ६५० मिलिग्राम लागु औषध (खैरो हेरोईन) बरामद करल बा ।

कैलाली टिकापुर नगरपालिका वडा नं. १ बल्क नं. ११ स्थित सडक खण्डमे ब्लक नं. २९ बैठना बर्ष २२ के शिशिर चौधरीथेनसे ११० मिलिग्राम (खैरो हेरोईन) बरामद करके पक्राउ करल बा  ।

ओस्टेक करके अँटवारके रोज लागु औषध (खैरो हेरोईन) सहित २ जनहनहे पक्राउ करले बा । पक्राउ परलमे जिल्ला कैलाली धनगढी उप–महानगरपालिका वडा नं. ०२ त्रिनगर स्थित नेपाल प्रहरी प्रदेश कार्यालय कञ्चनपुर ओ जिल्ला प्रहरी कार्यालय कैलालीसे खटल विशेष टोलीसे शंका लागके चेकजाँच कैना क्रममे जिल्ला कैलाली घोडाघोडी नगरपालिका वडा न. ०१ बैठना बर्ष १९ के करन परियार ओ बर्ष २२ के शिबराज ओझाके थेनसे ९ ग्राम १७० मिलिग्राम लागु औषध (खैरो हिरोईन) बरामद करल रहे । दुनु जनहनहे पक्राउ करके अनुसन्धान हुइटी रहल जिल्ला प्रहरी कार्यालय कैलाली जनैले बा ।

जनाअवजको टिप्पणीहरू