तीन महिने मोबाइल मर्मत तालिम निम्जल

तुलाराम ‘सनम’
जानकी, २३ चैत । कैलालीके जानकी ५ अमौरामे तीन महिने मोबाइल मर्मत तालिम निम्जल बा ।

सुदुरपश्चिम प्रदेश सरकार सामाजिक विकास मन्त्रालय अन्तर्गत व्यावसयिक तथा सीप विकास तालिम केन्द्र धनगढी तथा जानकी लघु उद्यम तथा बहु प्राविधिक प्रशिक्षण केन्द्र जानकी–५ कैलालीके सहकार्यमे निःशुल्क रुपमे संचालित पुस २० से चैत २२ गतेसम चलल मोबाइल मर्मत तालिमके सम्पन्न हुइल हो ।

जानकी लघु उद्यम तथा बहुप्राविधिक प्रशिक्षण केन्द्रके अध्यक्ष तुलाराम चौधरीके सभाअध्यक्षमे हुइल कार्यक्रममे वडका पहुना जानकी गाउँपालिकाके उपाध्यक्ष एवम् न्यायिक समितिके संयोजक लालमतीदेवी कठरिया रहल रहिट । कार्यक्रममे विशिस्ट पहुना जानकी ५ न. के वडाअध्यक्ष भीमबहादुर चौधरी, व्यावसायिक तथा सिप विकास तालिम केन्द्र धनगढीके प्रमुख भुवनराज पन्त रहल रहिट ।

तालिम समापन कार्यक्रममे जानकी गाउँपालिकाके कार्यपालिका सदस्य लक्ष्मी चौधरी, पार्वती चौधरी, पवित्रा बिश्वकर्मा, इन्द्रा सोप, न्यायिक समिति सदस्य केशन्ती चौधरी, अमौराके बड्घर बसन्ती चौधरी, तालिम केन्द्र धनगढीके लेखापाल प्रकाश बोहरा लगायतके उपस्थिति रहे ।

संस्थाके सचिव चक्र चौधरी स्वागत ओ ट्री स्टार एजुकेशनल हाउस अमौराके प्रिन्सिपल राजाराम चौधरी संचालन करल रहिट । तालिम २० जाने लेहल बटै ।