गायिका अनुहे ५० हजार राशिके प्रतिभा पुरस्कार प्रदान कैना
पहुरा समाचारदाता
टीकापुर, २३ चैत । कैलालीके टीकापुरमे टीकापुर साहित्य महोत्सव हुइना हुइल बा । इहे चैत २५ गतेसे २७ गतेसम महोत्सवके अवसरमे प्रदान करक लाग टीकापुर साहित्य समाजसे तीनठो पुरस्कार घोषणा करले बा । टीकापुर साहित्य समाजके अध्यक्ष तथा साहित्यकार महेशविक्रम शाह बिफेक रोज पत्रकार सम्मेलनमार्फत पुरस्कारके घोषणा करल हुइट ।
समाजसे एक लाख राशिके खड्गस्मृति राष्ट्रिय गौरव पुरस्कार २०७८ थोमस वर्गिज ओ मेरी वर्गिजहे अर्पण कैना जानकारी कराइल बा । टीकापुरमे योजनाबद्ध शहरके परिकल्पनाकार तत्कालीन मन्त्री स्वर्गीय खड्गबहादुर सिंहके सम्झानामे स्थापना हुइल उ पुरस्कार वर्गिज दम्पतीसे टीकापुरमे आवासीय विद्यालय (हाल वीरेन्द्र विद्यामन्दिर मावि) स्थापना कैके लम्मा समय यहाँके नागरिकके सन्ततिहे शिक्षा डेना काममे योगदान गरेवापत डेहे लागल हो । वर्गिज नेपालके टमान ठाउँमे विद्यालय खोलके अङ्ग्रेजी माध्यमके पढाइ विस्तार करले बाटै ।
ओस्टके, ५० हजार राशीके टीकापुर साहित्य समाज प्रतिभा पुरस्कार गायिका अनु चौधरीहे प्रदान कैना हुइल बा । सुदूरपश्चिमके प्रतिभाहे प्रदान कैना इ पुरस्कार युवा अवस्थामे नेपाली, खस ओ थारु भाषामे लोकप्रिय गीत गाके भाषा ओ कलाके उन्नयन ओ प्रवर्धनमे साधनारत चौधरीहे प्रदान करे लागल हो ।
उहेबीच, २५ हजार राशीके टीकापुर साहित्य समाज जेहेन्दार विद्यार्थी पुरस्कार टीकापुरके उच्च माविके सर्वोत्कृष्ट नतिजा लानल गणेशबाबा बोर्डिङ स्कुलके छात्र प्रवेश रावलहे प्रदान निर्णय करले बा ।
२०७८ माघ २४ गते स्थापना हुइल टीकापुर साहित्य समाजसे ‘साहित्यमार्फत सामाजिक सदभाव’ उद्देश्य राखके चैत २५ से २७ गतेसम टीकापुरमे साहित्य महोत्सव आयोजना कैना हुइल बा । महोत्सवमे देशके चर्चित लेखक, साहित्यकार, पत्रकारके उपस्थितिमे कला, साहित्य, शिक्षा, विकास, समाज, राजनीतिलगायतके २० ठो सत्रमे छलफल हुइना ओ एक हजार जाने सुन्ना हेरे पर्ना व्यवस्था करल आयोजक जनैले बा ।
