टमान वडामे सम्पन्न योजनाके अनुगमन

पहुरा समाचारदाता
हसलिया, २८ चैत । कैलारी गाउँपालिकामे संचालन हुइल टमान योजनाके गाउँपालिका स्तरीय अनुगमन टोलीसे मंगरके रोज अनुगमन कैगिल बा ।

गाउँपालिका स्तरीय अनुगमन टोलीसे संयोजक तथा कैलारी गाउँपालिकाके उपाध्यक्ष भगवतीकुमारी चौधरीके नेतृत्वमे वडा नम्बर ६ वडा कार्यालय घेरवारके लाग ८ लाख बजेटमे निर्माण सम्पन्न पर्खाल ओ गेट निर्माण योजनाके अनुगमन कैगिल बा ।
ओस्टेक वडा नम्बर ४ स्थित झलारी बाँध सिचाई योजनाके अनुगमन करल बा । उ योजनाके लाग ५ लाख रुप्या बजेट विनियोजन करल रहे । यी योजना सम्पन्न हुइलपाछे आब करिब २ सय किसान लाभान्वित हुइना वडा अध्यक्ष ठागुराम चौधरी बटैलै ।

ओस्टे वडा नम्बर ७ मे बायोग्याँस निर्माण योजनाके अनुगमन कैगिल योजना शाखाके प्रमुख सन्तोषकुमार चौधरी बटलै । यहाँ बायोग्याँस निर्माणके लाग ८ लाख रुप्या विनियोजन रहे । जेम्ने २१ ठो गोबर ग्याँस सम्पन्न हुइल बा । गाउँपालिका स्तरीय अनुगमन टोलीसे संयोजक भगवतीकुमारी चौधरी अनुगमन कैगिल तीनु सम्पन्न हुइल ओ योजनाके काम सन्तोषजनक रहल बटैली ।

अनुगमन टोलीमे अनुगमन टोलीमे योजना शाखा प्रमुख सन्तोषकुमार चौधरी, पूर्वाधार विकास समिति संयोजक तथा वडा नम्बर ६ के अध्यक्ष प्रेमबहादुर चौधरी, टोली सदस्य सुनिला चौधरी, प्राविधिक संजय कठरिया, सहायक कम्प्यूटर सुनिल चौधरी लगायतके सहभागिता रहल रहे ।