जिप दुर्घटनामे ६ के मृत्यु
धनगढी, २९ चैत । बैतडीमे जीप दुर्घटना होके ६ जनहनके मृत्यु हुइल बा । जयपृथ्वी राजमार्गअन्तर्गत पाटन नगरपालिका–८, झौलेक मोडमे मंगरके रात करिब ११ः२५ बजे जीप दुर्घटना हुइल हो । दुर्घटनामे ६ जनहनके घटनास्थलमे मृत्यु हुइल जिल्ला प्रहरी कार्यालय बैतडीके प्रहरी निरीक्षक योगेश खत्री जानकारी डेलै ।
मृत्यु हुउइयामे बझाङके केदारस्युँ गाउँपालिका–५, बाँझके ६० वर्षीय मने बोहरा, उहे ठाउँके ४० वर्षीय नरे बोहरा, ३५ वर्षीय गोरख बोहरा, ४५ वर्षीय मानबहादुर धामी, ४५ वर्षीय बिर्ख धामी ओ ४५ वर्षीय वीरे धामी रहल प्रहरी निरीक्षक खत्री जानकारी डेलै । उहाँहुक्रे सक्कु अक्के गाउँके हुइट ।
जीप सवार पाँचजाने सकुशल रहल बाटै । जीप गिरेलागल बेला सडकमे कुद्गल पाँचुजाने सकुशल रहल प्रहरी जनैले बा । झुलाघाटसे बझाङके बाग्थला ओर जैटी रहल से.१ ज ७६४ नम्बरके जीप अनियन्त्रित होके दुर्घटना हुइल प्रहरी जनैले बा ।
