प्रथम मुख्यमन्त्री राष्ट्रिय फेन्सिङ प्रतियोगिता सुरु

पहुरा समाचारदाता
धनगढी, २९ चैत । प्रथम मुख्यमन्त्री राष्ट्रिय फेन्सिङ प्रतियोगिता सुरु हुइल बा । प्रतियोगिताके मुख्यमन्त्री कमल बहादुर शाह उद्घाटन करले बाटै । बुधके एक कार्यक्रमके बीच मुख्यमन्त्री शाह प्रतियोगिताके उद्घाटन करल हुइट । प्रतियोगितामे त्रिभुवन आर्मी क्लब, एपिएफ क्लब तथा गण्डकी, बागमती, कोसी ओ सुदूरपश्चिम प्रदेशके छ ठो टीमके सहभागिता रहल सङ्घके अध्यक्ष जलिन्द्र शाही जानकारी डेलै ।

६ ठो टीममे महिला ओ पुरुष ३५–३५ सहित ७० जाने खेलाडीनके सहभागिता रहल जनाइल बा । फेन्सिङअन्तर्गत इपी ओ सेभर विधामे खेल हुइना बा । विधागत प्रतिस्पर्धामे प्रथम स्थान हासिल करुइयाहे १५ हजार, द्वितीयहे १० हजार ओ तृतीय स्थान हासिल करुइया खेलाडीहे पाँच हजार रुपैयाँ नगद पुरस्कार प्रदान कैना संघके अध्यक्ष शाही बटैलै ।

पोखरामे भर्खरे सम्पन्न नवौँ राष्ट्रिय खेलकुद प्रतियोगिताअन्तर्गत फेन्सिङमे सुदूरपश्चिम स्वर्ण पदक प्राप्त करल रहे । फेन्सिङके खेलाडीसमेत रहल शाही सुदूरपश्चिमहे स्वर्ण पदक डेहुवाइल रहिट ।

इ प्रतियोगितासे सुदूरपश्चिममे फेन्सिङ खेलहे चिन्हैना ओ खेलाडीहे प्रोत्साहनमे मद्दत पुग्ना आयोजकके अपेक्षा रहल बा । सुदूरपश्चिम प्रदेश सरकार मातहतके प्रदेश खेलकुद परिषद्से प्रतियोगिताके प्रायोजन करले बा ।