रानाथारु समुदायके सामाजिक ओ मानविय विकासके लाग प्रदेश सरकार तयार बाः मन्त्री देउवा
पहुरा समाचारदाता
धनगढी,१ बैशाख । रानाथारु समुदायके सामाजिक ओ मानविय विकासके लाग प्रदेश सरकार तयार रहल सुदूरपश्चिम प्रदेश सरकारके भौतिक पुर्वाधार विकास मन्त्री प्रकाश देउवा बटैले बटै ।
राना संस्कृति संरक्षण तथा विकास मञ्चके आयोजनामे धनगढी उपमहानगरपालिका वडा नम्बर १३ मे २ दिने रानाथारु महोत्सवके उदघाटन करटी मन्त्री देउवा कैलाली कञ्चनपुरमे रहल रानाथारु समुदायके विकासके लाग प्रदेश सरकार प्रतिबद्ध रहल उल्लेख करलै । कार्यक्रममे मन्त्री देउवाहे कैलाली कञ्चनपुरके रानाथरुहुकनके सामाजिक ओ मानविय विकासके लाग प्रदेश सरकारसे आवश्यक नीतिगत रुपमे ओ संरचनागत रुपमे सुधार करके कार्य आघे बह्रैना बटैलै । साथे उहाँ यैसिन महोत्सवसे रानाथारु साँस्कृति संरक्षण तथा सामाजिक विकास ओ साँस्कृतिक पर्यटन विकासमे महत्वपूर्ण भुमिका खेल्न उल्लेख करलै ।
अइना दिनमे यैसिन महोत्सवमे प्रदेश सरकारसे आर्थिक सहयोग कैना मन्त्री देउवा बटैलै । उ अवसरमे आयोजक राना संस्कृती संरक्षण तथा विकास मञ्चसे मन्त्रीहे ५ बुँदे ज्ञापन पत्र समेत पेश करल रहिट । जेम्ने धनगढी उपमहानगरपालिका वडा न १३ मे निर्माणा निर्माणाधीन रानाथारु संग्राहलयके जग्गाके स्वामित्व सग्रहालयके हुई पर्ना, सग्रहालयके निर्माणके लाग प्रदेश सरकारसे समन्वयकारी भुमिका खेले पर्ना, महोत्सके लाग अइना दिनमे बजेटके व्यवस्था करे पर्ना, मञ्चसे संचालन करटी रहल जनचेतना ओ शैक्षिक कार्यक्रमके लाग सरकारसे बजेट व्यवस्थापन करे पर्ना लगायतके माग रहल बा ।
उ महोत्सवमे धनगढी उपमहानगर पालिकाके उपमेयर कन्दकाला राना, कृष्णपुर नगरपालिकाके उप प्रमुख, वडा न १३ के वडा अध्यक्ष विजयराज जोशी, पूर्व प्रदेश सांसद मालामति रानालगायतसे महोत्सवके सफलताके लाग शुभकामना व्यक्त करल रहिट ।
दुई दिन सम चल्न उ महोत्सव विगत १३ वर्षसे नयाँ वर्षके दिनसे आयोजना करटी आइल बा । साथे उ महोत्सवमे राना समुदायके सास्कृति, खानाके परिकार ओ कलाकारसे सस्कृति झल्कैना पहिरन, नाँचगान ओ गित तथा सगित समेत प्रस्तुत करल रहिट । महोत्सवके मुख्य प्रवर्धक धनगढी उपमहानगरपालिका वडा न १३ रहल बा ।
