फोटो प्रतियोगिताके पुरस्कार रकम दृष्टि फाउण्डेशनहे सहयोग

पहुरा समाचारदाता
धनगढी, ३ बैशाख । लावा बरसके अवसरमे आयोजित फोटो प्रतियोगतामे कोपिला सिंह ठकुरी द्धितिय स्थान प्राप्त करले बाटी ।

रक्स फोटो स्टुडियो धनगढीसे आयोजना करल उक्त प्रतियोगितामे द्धितिय होके उहाँ नगद पाँच हजार रकम पुरस्कार प्राप्त करल रही । कैलाली बहुमुखी क्याम्पस बिबिएस चौथो सेमेस्टरमे अध्ययनरत उहाँ एक कार्यक्रमके बीच उ रकम दृष्टि फाउण्डेशन नेपाल धनगढीहे सहयोग करले बाटी ।

रकम हस्तान्तरण कार्यक्रममे कलाकार गुणाकर पनेरु, थारु विद्यार्थी समाज कैलाली बहुमुखी क्याम्पसके सचिवालय सदस्य दिपक चौधरी लगायत विद्यार्थीहुक्रनके उपस्थिति रहल रहे ।

दृष्टि फाउण्डेशन नेपालसे सहयोगी कोपिलाहे उत्तरोत्तर प्रगतिके कामना सहित आगामी दिनमे फेन उदाहरणीय, प्रशंसा योग्य ओ प्रेरणाके श्रोतके लाग अभार व्यक्त करले बा ।