ढिला सुस्ती रहल योजनाके कामहे तिब्रता डेना निर्देशन

पहुरा समाचारदाता
हसुलिया, ७ बैशाख । कैलारी गाउँपालिकाके टमान वडामे संचालन हुइल योजनाके गाउँपालिकास्तरीय अनुगमन समितिसे विफेक रोज अनुगमन कैगिल बा ।

गाउँपालिका स्तरीय अनुगमन समितिके संयोजक तथा कैलारी गाउँपालिकाके उपाध्यक्ष भगवतीकुमारी चौधरीके नेतृत्वमे वडा नम्बर ४, ५ ओ ७ मे संचालन हुइल टमान योजनाके अनुगमन कैगिल हो ।

अनुगमन समितिसे वडा नम्बर ४ अन्र्तगत प्रधानमन्त्री रोजगार कार्यक्रम, वडा नम्बर ७ प्रधानमन्त्री रोजगार कार्यक्रम रतनपुरमे सिचाईके लाग लोकनाथके खेतसे सगरपुरन खेतसम कुलो निर्माण तथा मर्मतके अनुगमन करल बा । यहाँ ५० सेन्टीमिटर गहिराई खोदे पर्नामे ३०–४० सेन्टीमिटर केल खोदल रहे । वडा नम्बर ५ राष्ट्रपति सुनहरा ताल आधारभुत विद्यालयके भवन निर्माणके अनुगमन कैगिल बा । यकर बजेट साढे २७ लाख रुप्या विनियोजन करल रहे । भवनके निर्माणके काम जारी ओ लिन्टरके प्रक्रियामे रहल बा । यी योजनाहे समयमे सम्पन्न कैना सुझाव डेहल बा ।

वडा नम्बर ५ के मनकामना प्राविके भवनके अनुगमन करल बा । यहाँ सम्झौता अनुसार काम हुइल बा । ८० प्रतिशत काम सम्पन्न हुके झयाल ढोका, पल्ला, डेस्क बेन्च, रंगरोगनके काम बाँकी रहल बा । वडा नम्बर ५ के स्थित जबदहुवासे छोटिपलियाके प्रहरी चौकीसमके सडक स्तरोन्नतीके अनुगमन करल बा । यकर लाग १५ लाख रुप्या बजेट विनियोजन करल रहे । यहाँ इस्टिमेट अनुसार जौन मेरिक माटी पटानी कैना रहे उ मेरिक नइहुइल हो । फेरसे डेनसिटी नपैना मेरिक काम करो कहटी उपभोक्ता समितिसे छलफल कैगिल बा । यहाँ माटी पहिले मिक्स कैना रहे, उ नइकरल कारण माटी बाहेर डेखल बा, उ चाही काहे बाहेर डेखल बा, तुरुन्त पुरा करे परल, नइकैना हो कलेसे माटी हटाई परल कहिके टोलीसे सुझाव डेले बा ।

वडा नम्बर ७ मे ७ लाख बजेटमे निर्माणधिन कोठर घरके अनुगमन करल बा । उहाँ ९० प्रतिशत काम हुइल बा, पिल्लर पुरा हुके कोठामे माटी पटानी काम हुइल बा । दुई हजार इटाके चुनाई बाँकी बा, उपभोक्ता समिति हप्ता दिनमे काम सम्पन्न कैना समितिहे कहले बा ।

ओस्टेक तराई मधेश कार्यक्रम अन्र्तगतके जवदहवासे रतनपुर हुइटी भुइयाफाँटा विओपीसमके सडकके स्तरोन्नतीके कामके अनुगमन करल बा । यहाँ तराई मधेश कार्यक्रम अन्र्तगतके ३० लाख ओ गाउँपालिकाके २० लाख करके ५० लाख बजेट विनियोजन करले बा । यम्ने ठेकेदारसे मटेरियल गिरैले बा । काम ठोरिक ढिला सुस्ती हुइटी रहल ओरसे काम हाली कैना समितिसे सुझाव डेहल बा ।

ओस्टेक करके पालिकास्तरीय अनुगमन समितिसे वडा नम्बर ४ मे संचालन हुइटी रहल सामाजिक परिचालक तालिमके अनुगमन करले बा । गाउँपालिकाके आर्थिक सहयोगमे संचालन हुइल यी तालिममे १८ जनहनके सहभागिता रहल बा । कलेसे वडा नम्बर ४ मे अध्यक्ष स्वरोजगार कार्यक्रम अन्र्तगत संचालन हुइल खाजा नास्ता तालिमकेफे अनुगमन कैगिल बा । यी तालिममे १४ जनहनके सहभागी रहल बा ।

अनुगमनमे कार्यक्रममे गाउँपालिका स्तरीय अनुगमन समितिके संयोजक तथा कैलारी गाउँपालिकाके उपाध्यक्ष भगवतीकुमारी चौधरी, पूर्वाधार विकास समिति संयोजक प्रेमबहादुर चौधरी, समितिके सदस्य सुनिला चौधरी, सदस्य सचिव सन्तोषकुमार चौधरी, वडा नम्बर ४ वडा अध्यक्ष ठागुराम चौधरी, प्राविधिक सुनिल चौधरी, प्रधानमन्त्री रोजगार कार्यक्रमके रोजगार सहायक इन्द्रश्याम चौधरी, सहायक कम्प्यूटर अपरेटर रामकृष्ण चौधरी, पाँच नम्बर वडा सदस्य अनारकली चौधरी, कार्यपालिका सदस्य सुन्दरी चौधरी, कार्यपालिका सदस्य हरिद्वारी चौधरी लगायतके सहभागिता रहे ।