कठरियाथारु लोपोन्मुख सांस्कृतिक दस्तावेज संकलन कार्यक्रम
पहुरा समाचारखाता
बर्दगोरिया, ९ बैशाख । कैलालीके बर्दगोरियामे कठरियाथारूनके लोपोन्मुख सांस्कृतिक दस्तावेज संकलन कार्यक्रम कैगिल बा । कठरियाथारु समुदायके लोपउन्मुख सँस्कृति दस्ताबेजीकरण कैके संरक्षण ओ प्रबद्र्धन कैना उद्देश्यसे कार्यक्रमके आयोजना कैगिल कठरिया समाज नेपालके उपाध्यक्ष गीता कठरिया बटैली ।
कठरिया समाज नेपालके आयोजनामे कैलालीके टमान ठाउँके प्रबुद्ध व्यक्तित्वहुकनक उपस्थितिमे हुइल एक दिने कार्यक्रममे कठरिया समुदायके टमान लोपउन्नमुख सँस्कृति, चालचलन ओ रितिरिवाजके बारेमे छलफल तथा दस्तावेज संकलन कैगिल उहाँ बटैली ।
बर्दगोरिया गाउँपालिकाके आर्थिकमे हुइल कार्यक्रमके वडका पहुना वडा नम्बर ५ के अध्यक्ष भोलेराम डंगौरा रहिट । कार्यक्रममे बोल्टी उहाँ कठरियाथारु समुदायके ढेर कला, संस्कृति रहल मने उ लोप हुइटीगैल बाट बटैलै े। वडा अध्यक्ष डंगौरा कहलै ‘यी समुदायके परम्परागत सक्कु कला, संस्कृति पुर्खानहे केल पत्ता बाटिन । लौव पिढी सब विस्रैटी गैल बटैं, यिहीहे पुस्तान्तरण ओ दस्ताबेजीकरण नइकरलेसे लोप होजाई ।’
कठरियाथारु समुदायके पहिरन नेंहगा ओ चोलिया कोई–कोई पुर्खा मनै केल घल्ठै । अब्बेक पिढी अपन पहिरन लगाइ छोरल बटै, अपन भाषाफे बोल छोरल बटै । हमार पहिरन, कला, संस्कृति, टरटिहुवार सब हेरागिलेसे पहिचान नइरहना वडा अध्यक्ष बटैलै ।
कठरियाथारूनके लोपोन्मुख सांस्कृतिक दस्तावेज संकलन कार्यक्रममे बर्दगोरिया गाँउपालिका–५ के वडा सदस्य नैनबहादुर डगौराथारू, सोनियादेवी डगौरा, कठरियाथारु समुदायके बुद्धिजिवी मिना कठरिया, दिलबहादुर कठरिया, अर्जुन कठरिया, सुबेश कठरिया लगागतके सहभागिता रहे ।
