सीप रलेसे जहाँफे आर्थिक आर्जन करेसेक्जाईः गापा अध्यक्ष

पहुरा समाचारदाता
हसुलिया, १३ बैशाख । कैलाली जिल्ला कैलारी गाउँपालिकाके अध्यक्ष रामसमझ चौधरी सीप रहेलेसे कोईफे भुखे नइमुना, जहाँफे जाके आर्थिक उर्पाजन करसेक्ना बटैले बटै ।

कैलारी गाउँपालिकाके आर्थिक सहयोगमे चेतना विकास समाजके आयोजनामे अध्यक्ष स्वरोजगार कार्यक्रम अन्र्तगत हुइल व्यूटिपार्लर तालिम समापन ओ केक बनैना तालिमके उदघाटन कार्यक्रमके वडका पहुना रहल उहाँ उ बाट बत्वाइल रहिट । कार्यक्रममे बोल्टी उहाँ सीप रहल व्यक्तिहे आर्थिक उर्पाजन कैना सहजुल हुइना ओ देश विदेशमेफे जाके काम करे सेक्ना बटैलै । व्यूटीपार्लरके सम्भावनाफे अब्बे ढेर बा । भोज विहामे महिलाहुक्रे सुन्दरताके लाग आब व्यूटीपार्लर जैना करठै । अपने व्यवसाय सुरु करलेसे आयस्रोतमे बृद्धि करे सेक्ना बटैलै ।

ओस्टेक लर्का बच्चनके जनम दिनमे केक कटना प्रचलनफे बह्रटी गैल ओरसे यी ताालिमफे आवश्यक रहल उहाँ बटैलै । विना केकके लर्का जनम मनाइ नइचाहठै, कौनो संघसंस्थाके बार्षिकोत्सव मनैना हुइलेसेफे केक कटना चलन बह्रल अध्यक्ष राजसमझ चौधरी बटैलै । तालिम सिखके सीपके सदुपयोग करलेसे केल पालिकासे विनियोजित करल बजेटके सार्थकता हुइना उहाँ बटैलै ।

चेतना विकास समाजके उपाध्यक्ष लक्ष्मनिया चौधरीके अध्यक्षतामे हुइल व्यूटिपार्लर तालिम समापन ओ केक बनैना तालिमके उदघाटन कार्यक्रममे वडा नम्बर ४ के वडा अध्यक्ष ठागुराम चौधरी, वडा नम्बर ८ के वडा अध्यक्ष तारामल कठरिया, योजना शाखा प्रमुख सन्तोषकुमार चौधरीलगायतके सहभागिता रहे ।

वडा नम्बर १ के आर्थिक सहयोगमे संचालन हुइयल ४५ दिने व्यूटीपार्लर तालिममे १० जाने सहभागि रहिट । तालिममे प्रशिक्षण अञ्जलीकुमारी चौधरी करल रहित । ओस्टेक वडा नम्बर ६ मेफे यी तालिम संचालन हुुइल बा । यहाँफे १० जाने सहभागी बटै । प्रशिक्षण रत्ना चौधरी डेटटी रहल बटी । ओस्टेक वडा–१ मे बुधसे संचालन हुइल एक हप्ते केक बनैना तालिममे १५ जाने सहभागी बटै । यी तालिममे सुनिल चौधरी प्रशिक्षण डेटी रहल बटै ।

कार्यक्रमके संचालन चेतना विकास समाजके व्यवस्थापक कल्याण घिमिरे करले रहिट । ओ स्वागत मन्तव्य सदस्द जागुराम चौधरी करले रहिट ।