रेडियो प्राविधिकहे क्षमता विकास तालिम
पहुरा समाचारदाता
धनगढी, १५ बैशाख । सुदूरपश्चिमके टमान रेडियो तथा एफएममे कार्यरत प्राविधिकहुक्रनके लाग क्षमता विकास तालिम आयोजना करगिल बा ।
आन्तरिक मामिला तथा कानून मान्त्रालय सुदूरपश्चिमके सहकार्य तथा नेपाल पत्रकार महासंघ सुदूरपश्चिम प्रदेशके आयोजनामे तालिम आयोजना करल हो । शुकके रोज आन्तरिक मामिला तगा कानून मन्त्रालयके सचिव कमलराज ढकाल तालिमके उद्घाटन करल हुइट ।
कार्यक्रमके बर्का पहुना समेत रहल सचिव ढकाल तालिमसे रेडियो प्राविधिकहुक्रनके क्षमता विकास हुइनामे विश्वास व्यक्त करल रहिट । साथे उहाँ तालिम पश्चात सहभागीहुक्रनहे आपन कार्यक्षेत्रमे पूर्णरुपमे लागू कैना आग्रह करल रहिट ।
कार्यक्रममे नेपाल पत्रकार महासंघके केन्द्रीय सचिव हेमकर्ण विक रेडियो महत्वपूर्ण सञ्चारके माध्यम रहल बटैलै । उहाँ रेडियोके सञ्चालक तथा प्राविधकहुक्रे प्राविधिक रुपमे दक्ष नैरलेसे रेडियोसे प्रसारण हुइना समाचार तथा अन्य कार्यक्रम स्रोतामाझ नैपुगे सेक्ना बटैलै । साथे उहाँ क्षमता विकास तालिमसे दक्ष प्राविधक उत्पादन हुइना विश्वास व्यक्त करल रहिट ।
तालिममे सुदूरश्चिम प्रदेशके नौ जिल्लाके टमान रेडियो एफएममे कार्यरत २५ जाने प्राविधिकहे तालिम डेटी रहल बा । तालिम तीन दिन सञ्चालन हुइना आयोजक जनैले बा ।
तालिमके उद्घाटन नेपाल पत्रकार महासंघ सुदूरपश्चिमके अध्यक्ष योगेश रावलके अध्यक्षतामे हुइल रहे । कार्यक्रममे स्वागत मनतब्य महासंघके सचिव हरि जोशी करल रहिट कलेसे कार्यक्रमके सञ्चालन महासचिव रामसिंह ठगुन्ना करल रहिट ।
