गुणस्तरीय सेवा प्रवाह कैना आग्रह
पहुरा समाचारदाता
धनगढी, १५ बैशाख । सुदूरपश्चिम प्रदेशके मुख्यमन्त्री कमलबहादुर शाह नेपाल दूरसंचारहे सक्कु क्षेत्रमे सूचनाके पहुँच पुगैनाकेसँगे गुणस्तरीय सेवा प्रवाह कैना आग्रह करले बाटै ।
नेपाल दूरसंचार प्राधिकरण काठमाण्डौंके आयोजनामे शुकके रोज धनगढीमे हुइल सुदूरपश्चिम प्रदेशमे संचार सेवाके वर्तमान अवस्था ओ गुणस्तर विषयमे सेवा प्रदायक ओ सरोकारवाला बीच हुइल अन्तरक्रिया कार्यक्रमहे सम्बोधन कैटी मुख्यमन्त्री शाह ओइसीन आग्रह करल हुइट ।
मुख्यमन्त्री शाह सूचनाके विकास जौन रुपमे विकास हुइलेसे फेन उ रुपमे सेवा सुविधासे वञ्चित रहल बटैलै । उहाँ सुदूरपश्चिमके भौगिलिक अवस्था लगायत अन्य कारणसे पहाडी क्षेत्र ओ ग्रामीण क्षेत्रमे आभिन फेन संचार सेवाके पहुँचसे दूर रहल बटैटी उ क्षेत्रमे फेन सेवा प्रादायक संस्थाहे आपन गुणस्तरीय सेवा प्रवाह कैना जोड डेलै ।
‘सञ्चारके विकास जौन रुपमे हुइल बा, उ मेरके हम्रे सञ्चार क्षेत्रसे बाहर बाटी, आभिन फेन पहाडी क्षेत्र तथा ग्रामीण दुरदराजके व्यक्ति सूचनाके पहुँचसे बाहर रहल बाटै’, मुख्यमन्त्री शाह कहलै–‘पहाडी क्षेत्र तथा दुरदराज ग्रामीण एरियामे फेन दूरसञ्चार आपन गुणस्तीय सेवा सहित आपन क्षेत्र विस्तार करे परल ओकर लाग प्रदेशसे हुइना सहयोगके लाग प्रदेश सरकार तयार रहल बा ।’
प्रदेशके आर्थिक मामिला तथा योजनामन्त्री नरेश कुमार शाही प्रदेशके गाउँघर, स्कूल कलेजमे दूरसंचारसे आपन सेवा विस्तार करे पर्ना जोड डेलै । ‘निर्वाचनताका मोर चुनावी एजेण्डा नै रहे गाउँघर सक्कु क्षेत्रमे नेट इन्टरनेट लगायत संचारके सेवा पुगैना, जेष्ठ नागरिक एजुकेशन चलैना’, उहाँ कहलै–‘अब्बे मै निर्वाचित होके मन्त्रीसमेत हुइल बाटुँ, दूरसंचारसे प्रदेश सरकारसे समन्वय सहकार्यके लाग कार्य योजना सहित आइपरल । पहाडी एरियामे संचार सेवा विस्तारके लाग प्रदेश सरकार सहकार्य कैना तयार बा ।’
मुख्यमन्त्री तथा मन्त्रीपरिषद सुदूरपश्चिम प्रदेशके प्रमुख सचिव नारायणप्रसाद शर्मा दुवाडी सूचना तथा संचार सेवासे आम नागरिकके जीवन सहज हुइल बटैलै । मने प्रमुख सचिव दुवाडी सुदूरपश्चिम प्रदेशमे संचार सेवाके पहुँच ओ गुणस्तरके अवस्था कमजोर रहल बटैलै ।
कार्यक्रम नेपाल दूरसंचार प्राधिकरणके पुरुषोत्तम प्रसाद खनालके अध्यक्षतामे हुइल रहे । कार्यक्रममे प्राधिकरणके अर्जुन घिमिरे सुदूरपश्चिम प्रदेशम संचार सेवाके वर्तमान अवस्था ओ गुणस्तरबारे कार्यपत्र प्रस्तुत करल रहिट ।
कार्यक्रममे स्थानीय तहके प्रमुख तथा उपप्रमुख, सरकारी तथा गैर सरकारी संघसंस्थाके प्रतिनिधी, संचारकर्मीहुक्रनके सहभागिता रहल रहे ।
