मापदण्ड नइपुगल निर्माण योजनाके बजेट रोक्न

पहुरा समाचारदाता
हसुलिया, २१ बैशाख । कैलारी गाउँपालिका वडा नम्बर ५ मे संचालन हुइल योजनाके गाउँपालिकास्तरीय अनुगमन समितिसे विफेक रोज अनुगमन कैगिल बा ।

गाउँपालिका स्तरीय अनुगमन समितिके संयोजक तथा कैलारी गाउँपालिकाके उपाध्यक्ष भगवतीकुमारी चौधरीके नेतृत्वमे वडा नम्बर ५ संचालन हुइल दुई योजनाके अनुगमन कैगिल हो ।

कैलारी गाउँपालिका वडा नम्बर ५ स्थित जबदहुवासे छोटिपलियाके प्रहरी चौकीसमके सडक स्तरोन्नतीके अनुगमन करल बा । यकर लाग १५ लाख रुप्या बजेट विनियोजन करल रहे । यहाँ मापदण्ड अनुसार काम नइहुइटसम बजेट पास नइकैना समितिके संयोजक भगवतीकुमारी चौधरी बटैली ।

पहिले माटी डारके ग्राभेल माटी मिलाके पानी पिच कैना रहे । ओइसिन नइहुइल डेखल बा, समितिके संयोजक कहली, ‘यहाँ माटी पहिले मिक्स कैना रहे, उ नइकरल कारण माटी बाहेर डेखल बा, उ चाही काहे बाहेर डेखल बा, तुरुन्त पुरा करे परल, नइकैना हो कलेसे फेरसे जोटके डबाई परल ।’

निर्माण कम्पनीके शिव सोडारी काम करिब करिब ओराइल बटाई पानी नइहुके माटी पिच जैसिन डेखल बा । उ दिनके पानीसे हिला हुगैल स्थानीय बटैठै । निर्माण कम्पनीसे फेरसे कमी हुइल ठाउँमे काम कहले बा ।

गाउँपालिका स्तरीय अनुगमन समितिसे उ सडक अन्र्तगत पालिकाके १५ लाख ८० हजार बजेटसे बन्टी रहल कल्भर्टके अनुगमनफे करले बा ।

ओस्टेक चेतनशिल महिला बहुउद्देश्यीय कृषि सहकारी संस्थाके प्लान्ट मिलके अनुगमन करल बा । वडा नम्बर ५ सडकमे निर्माण कैगिल ओ करिब चालु कैना अवस्थामे रहल उ प्लान्ट मिलके अनुगमन कैगिल हो । निर्माण सम्पन्न हुइल मिलके लाग मिल चलैना मनै नइहुइलपाछे संचालन नइहुइल जनागिल बा ।

अनुगमनमे कार्यक्रममे गाउँपालिका स्तरीय अनुगमन समितिके संयोजक तथा कैलारी गाउँपालिकाके उपाध्यक्ष भगवतीकुमारी चौधरी, पूर्वाधार विकास समिति संयोजक प्रेमबहादुर चौधरी, समितिके सदस्य सुनिला चौधरी, सदस्य सचिव सन्तोषकुमार चौधरी, प्राविधिक सुनिल चौधरी, कृषि शाखा प्रमुख मैया चौधरीलगायतके सहभागिता रहे ।