नगरप्रमुख हमालसे सामुदायिक विद्यालयहे १० लाख बराबरके शैक्षिक सामग्री डेना घोषणा
पहुरा समाचारदाता
धनगढी, २२ बैशाख । आधारभूत तह कक्षा ८ के परीक्षामे शून्य नतिजा ननुइया धनगढीके सामुदायिक विद्यालयहे चालु शैक्षिक सत्रमे १० लाख बराबरके शैक्षिक सामग्री डेना हुइल बा ।
शुकके विद्यालयके प्रधानाध्यापक ओ व्यवस्थापन समितिके अध्यक्षहुकनसंग करल अन्तरक्रिया कार्यक्रममे नगरप्रमुख गोपाल हमालसे अपने प्राप्त कैना सेवा सुविधाके रकमसे विद्यालयहुकनके लाग शैक्षिक सामग्री खरिद करके उपलब्ध करैना बटाइल हुइट । नगरप्रमुख हमालसे एक वर्षमे पैना सेवा सुविधाके रकम अपुग हुइलेसे अपने व्यक्तिगतओरसेफे रकम थप करके विद्यालयहुकनहे १० लाख मूल्यके शैक्षिक सामग्री १७ विद्यालयहे उपलब्ध करैना बटैले बटै ।
विद्यालयके प्रधानाध्यापकहुकनहे शैक्षिक सामग्रीके अभावसे पठनपाठनमे समस्या हुइल बताइलपाछे नगरप्रमुख हमालसे कापी किताब, कलम, मसी लगायत विद्यालयसे पठनपाठनमे प्रयोग कैना शैक्षिक सामग्री खरिद करके प्रदान कैना बटाइल हुइट । उहाँ विद्यार्थीहुकनहे विद्यालयमे टिकैना ओ मजा नतिजा नन्ना सक्कु पक्षसे लैजाई पर्ना बटैटी शैक्षिक सामग्रीके अभावमे पठनपाठन कमजोर हुई नइडेना उपमहानगरसे सक्कु मेरिक सहयोग कैना बटैले बटै ।
धनगढीमे आयोजित १७ विद्यालयसंग करल अन्तरक्रिया कार्यक्रममे अइना शैक्षिक सत्रमे मजा नतिजा नन्ना ओ सामुदायिक विद्यालयके सिकाइ उपलब्धी मजा बनैना उपमहानगरसे अइना आर्थिक वर्षमे ठोस योजना ओ कार्यक्रम नन्ना हुइल बा । नगरप्रमुख हमालसे शिक्षा क्षेत्रमे मजा नतिजा हासिल कैना परामर्शदाताके सहयोग लेना ओ शिक्षाके लाग बहुपक्षीय साझेदारी कैना योजना रहल बटैले बटै ।
सामुदायिक विद्यालयके नतिजा मजा बनैना उपमहानगरसे काम करी । यी वर्षसे विद्यालयके अवस्था सुधार कैना सक्कु जाने लागे परी,’ उहाँ कहलै, ‘उपमहानगरके समग्र शैक्षिक अवस्था सुधारके लाग हम्रे विज्ञके सहयोग लेके काम कैना योजना बनैले बटी ।’
कार्यक्रममे नगरउपप्रमुख कन्दकलाकुमारी राना विद्यालयके गुणस्तर वृद्धि कैना अनुगमन ओ सहयोगसँगसँगे अआघे बहै्रना बटैली । उहाँ विद्यालयके अनुगमन कैना अपनही खटन ओ धनगढीके सामुदायिक विद्यालयके अवस्था सुधार कैना उपमहानगरसे काम कैना बटैले बटी ।
कार्यक्रममे १७ विद्यालयके प्रधानाध्यापक ओ व्यवस्थापन समितिके अध्यक्ष सिकाइके अवस्था सुधार कैना शैक्षिक सामग्री अपुग हुइना बताइलपाछे भर्ना शैक्षिक सत्रके सुरुमे १७ सामुदायिक विद्यालयहे शैक्षिक सामग्री सहयोग कैना ओ नतिजा मजा नन्ना शिक्षक ओ व्यवस्थापन समितिसेफे उपमहानगरके योजना कार्यान्वयन कैना लैजाई पर्नामे जोड डेहल रहिट ।
ओस्टेक कार्यक्रममे सहभागी विद्यालयके प्रअ, विद्यालय व्यवस्थापन समितिके अध्यक्ष तथा प्रतिनिधिहुक्रे विषयगत शिक्षकके अभाव, दरबन्दीके अभाव, प्रअ, शिक्षक, अभिभावकविच समन्वयके कमी ओ विद्यार्थीहुकनके कमी कम्जोरीसे कक्षा ८ के परिक्षाफलमके शुन्य आइल बटैले बटै । उहाँहुक्रे अइना दिनमे सुधारके लैजैनाफे प्रतिबद्धता जनैले बटै ।
अन्तरक्रिया कार्यक्रममे प्रमुख प्रशासकीय अधिकृत रामलाल श्रेष्ठ, शिक्षा, युवा तथा खेलकुद महाशाखा प्रमुख नरेन्द्रबहादुर खाती, डिभिजनल इन्जिनियर दिजराज भट्ट, प्रशासकीय अधिकृत सुरेन्द्रसिंह कार्की, पन्चोदय माध्यमिक विद्यालयके प्रधानाध्यापक हरिशकुमार ओझालगायतके सहभागिता रहल रहे ।
