चराविद् डंगौराहे राष्ट्रिय युवा प्रतिभा सम्मान
पहुरा समाचारदाता
धनगढी, २५ वैशाख । कैलालीके हिरुलाल डंगौरा राष्ट्रिय प्रतिभा सम्मानके लाग छनोट हुइल बटै । अढाई वर्षसे चिरै संरक्षणमे क्रियाशील युवा तथा खेलकुद मन्त्रालयसे उहाँहे आर्थिक वर्ष २०७९–८० मे प्रदान कैना राष्ट्रिय युवा प्रतिभा सम्मानके लाग वातावरण संरक्षण क्षेत्रसे छनोट करल हो । भजनी नगरपालिका–६ निवासी डंगौरा बाल्यकालसे वन, वातावरण, वन्यजन्तु तथा चरा संरक्षणमे क्रियाशील रहल बटै ।
सम्मानके लाग नेपाल सरकारसे अपनहे छनोट करलमे उहाँ खुशी व्यक्त करलै । उहाँ नेपाल पंछी संरक्षण संघ (बीसीएन) मे चिरै विज्ञके रुपमे कार्यरत रहल बटै । डगौरा सुदूरपश्चिम प्रदेशमे दुर्लभ गिद्ध, खरमजुर, सुनौलो तोप चराके हरेक वर्ष अनुगमन करटी आइल बटै ।
ओस्टेक करके नेपालके पहिल चरा आरक्ष घोडाघोडी चरा अभय आरण्य क्षेत्र, बसन्ता कोररीडोर ओ शुक्लाफाँटा राष्ट्रिय निकुञ्जके सिमसार क्षेत्रमे नियमित चरा अनुगमन तथा संरक्षणके लाग समुदायस्तरमे सचेतनामूलक कार्यक्रमसमेत करटी आइल बटै ।
स्कुल पढ्ना बेलासे डगौरा कैलालीके संरक्षणकर्मी भोजराज श्रेष्ठ (गुलेली बाजे) संगे गुलेली संकलन अभियानमे संलग्न रहल रहिट । डल्फिन संरक्षण क्षेत्रमे समेत अग्रणी भूमिका निर्वाह करटी आइल डगौरा २०१० मे अब्राहम संरक्षण पुरस्कार ओ २०१२ मे वातावरण संरक्षण पुरस्कार प्राप्त करल रहिट । जीवनके पूरै समय संरक्षणमे बिटटी रहल उहाँ बटैलै ।
