कैलारीमे पाँच दिने अचार बनैना तालिम

पहुरा समाचारदाता
हसुलिया, २७ बैशाख । कैलालीके कैलारी गाउँपालिका वडा नम्बर ५ मे पाँच दिने अचार बनैना तालिम डेगिल बा ।

कैलारी गाउँपालिका उद्यम विकास शाखाके आयोजनामे आठ दिने उद्यमशीलता विकास तालिम पाई सेकल वडा नम्बर ५ ओ ७ के सम्भावित उद्यमीहुकनहे माग तथा सम्भाव्यतामे आधारित अचार बनैना तालिम डेगिल हो ।

गरिबी निवारणका लागि लघु उद्यम विकास कार्यक्रम मेड्पा अन्तर्गत डेगिल तालिम समापन कार्यक्रमके वडका पहुना कैलारी गाउँपालिकाके सामाजिक विकास शखा प्रमुख यगम रहल रहिट । तालिम समापन कार्यक्रममे बोल्टी उहाँ गाउँघरमे खेर जैना आम, लरङगी, औँरा, अमार, मुरै लगायत टमान चिजके अचार बनाके आम्दानीके स्रोत बह्राई सेक्ना बटैलै । आमके सिजन सुरु हुइल ओरसे आब प्रयाप्तमात्रमे आमके अचार बनाई सेक्ना उहाँ बटैलै ।

वडा नम्बर ५ के वडा अध्यक्ष विष्णुप्रसाद चौधरीके अध्यक्षतामे हुइल तालिम समापन कार्यक्रमके संचालन लघु उद्यम विकास शाखाके प्रमुख प्रदीप चौधरी करल रहिट । यिहे बैशाख २२ गतेसे सुरु २६ गतेसम हुइल तालिममे वडा नम्बर ५ ओ ७ के १२ जानेक सहभागिता रहे । तालिममे प्रशिक्षण श्यामलाल खनाल डेहल रहिट । समापन कार्यक्रममे वडा नं ५ ओ ७ के वडा सदस्य तथा कर्मचारीहुकनकेफे उपस्थिति रहे ।