नागरिक उन्मुक्ती पार्टी प्रदेशसभामे जिम्मेवारी फेरबडल

पहुरा समाचारदाता
धनगढी, २७ बैशाख । नागरिक उन्मुक्ति पार्टी सुदूरपश्चिम प्रदेश संसदीय दलके नेताके जिम्मेवारी घनश्याम चौधरीहे डेहल बा ।

बुधके रोज संसदीय दलके कार्यालयमे बैठल बैठकसे घनश्याम चौधरीहे उ जिम्मेवारी डेहल रामेश्वर चौधरी पहुरा दैनिकहे बटैलै । उहाँ कहलै, यिहीसे आघे सुदूरपश्चिम प्रदेशमे संसदीय दलके नेताके जिम्मेवारी महिहे डेहल रहे । हम्रे दुई जाने दुई÷चारदिन भिटरे सरकारमे जैना ओरसे पार्टीके सहमतिसे जिम्मेवारी दुसर माननीयहे सौपल हो ।’ ओस्टेक माननीय प्रदेशसभा सभा सदस्य लक्ष्मणकिशोर चौधरी पार्टीके निर्णय अनुसार सुदूरपश्चिम प्रदेशमे जिम्मेवारी फेरबदल हुइल बटैलै ।

सुदूरपश्चिम प्रदेशमे प्रमुख सचेतकके जिम्मेवारी खुसीराम चौधरीहे डेहल बा । यिहीसे आघे लक्ष्मणकिशोर चौधरी प्रमुख सचेतक रहिट । सचेतकके जिम्मेवारी कैलाश चौधरीहे डेहल बा । सात जाने प्रदेशसभा सदस्य रहलमे नागरिक उन्मुक्ती पार्टीसे सुदूरपश्चिम प्रदेशमे सामाजिक विकास मन्त्रालय ओ भुमि व्यवस्था तथा कृषि सहकारी मन्त्रालय दावी करल माननीय रामेश्वर चौधरी बटैलै ।

संसदीय दलके नेतासहित और जिम्मेवारी परिवर्तन कैना बैठल बैठकमे लक्ष्मण किशोर चौधरी, घनश्याम चौधरी, खुसीराम चौधरी, कैलाश चौधरी ओ इन्दिरा गिरी उपस्थित रहिट । प्रदेश सांसद रामेश्वर चौधरी ओ टीका थापा भर बैठकमे उपस्थित नइरहिट ।