विपदमे सहि तथ्याङकके आवश्यक ः गापा अध्यक्ष
पहुरा समाचारदाता
हसुलिया, २८ बैशाख । कैलाली जिल्लाके कैलारी गाउँपालिकामे विपद पूर्व तयारी तथा प्रतिकार्य समितिके पुनगर्ठन ओ विपद पूर्व तयारी तथा प्रतिकार्य योजना समिक्षा अध्यावधिक कार्र्यशाला हुइल बा ।
कैलारी गाउँपालिकाके आयोजनामे हयावीटेट फर हुमानिटी नेपाल, राष्ट्रिय दलित नेटवर्क सहास नेपाल, सिसिएस ओ नेपाल रेडक्रस सोसाइटी कैलालीके सहकार्यमे विपद पूर्व तयारी तथा प्रतिकार्य समितिके पुनगर्ठन ओ विपद पूर्व तयारी तथा प्रतिकार्य योजना समिक्षा अध्यावधिक कार्र्यशाला हुइल हो ।
गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे कैलारी गाउँपालिका विपद उच्च जोखिम रहल बटैलै । उहाँ कहलै, ‘यी पालिका बर्षेणी बाढ डुबान, कटान ओ समस्या झेल्टी आइल बा । गैल बरष आगलागीसे एक ठो बस्तीके आधा गाउँ पुरा राख हुइल बा । उहीसे आघे आँधीसेफे यी पालिका ओटरे प्रभावित रहल बा ।’
विपदके बेला सही तथ्यांक नइआइलपाछे पीडित ओ प्रभावितहुकनके राहत वितरण कैना समस्याफे आइल उहाँ बटैलै । गाउँपालिका स्तरीय विपद पूर्व तयारी तथा प्रतिकार्य समिति सक्रिया हुके काम करलेसे उहीहे हुइना जोखिमहे न्यूनिकरण करे सेक्ना अध्यक्ष बटैलै । यी पालिकामे विपदके बेला टमान संघसंस्थाके सहयोग समन्वय ढेर काम हुइल ओरसे अइना सहकार्य जारी रहना उहाँ बटैलै ।
गाउँपालिका स्तरीय विपद पूर्व तयारी तथा प्रतिकार्य समितिसे विपद जोखिम न्यूनिकरण तथा व्यवस्थापन ऐन २०७४ उल्लेख हुइल बमोजिमके विपदमे काम कैना दिनेश चन्द्र जोशी बटैलै । समितिसे अतिबृष्टि, अनाबृष्टि, खडेरी, बाढी, हुरी बतास, शीतलहर, तालुल हावा, बाज, असिनापानीलगायत विपदमे काम कैना कहल बा ।
कार्यक्रममे उपाध्यक्ष भगवतीकुमारी चौधरी, प्रमुख प्रशासकीय अधिकृत विरबहादुर ऐर, वडा अध्यक्ष, कार्यपालिका सदस्य, तमान संघसंस्थाके प्रतिनिधिहुकनके सहभागिता रहे । कार्यक्रममे सहजीकरण सामाजिक विकास प्रमुख यगम कलेल करले रहिट ।
