जनचेतनामूलक सडक नाटक प्रदर्शन
पहुरा समाचारदाता
कञ्चनपुर, २९ वैशाख । विद्यालयसे बाहेर रहल बालबालिकाहुकनहे भर्ना करैना अभिभावकहे सचेत करना उद्देश्यके साथ लालझाडी गाउँपालिका–१, नैरंगास्थित छेदुचौराहमे सडक नाटक प्रदर्शन करल बा ।
अनौपचारिक क्षेत्र सेवा केन्द्र (इन्सेक) नैरंगास्थित शारदा राष्ट्रिय माध्यमिक विद्यालयमे गठित बाल अधिकार चेतना समूहसे विद्यार्थी भर्ना अभियानके अवसरमे तयार पारल उ सडक नाटक प्रदर्शन करल हो ।
मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्य प्रति सचेत परना जिम्मेवार निकायहे जवाफदेही बनैना उद्देश्यसे सडक नाटक प्रदर्शन करल बा । नाटक प्रदर्शनमे शिक्षक, विद्यार्थी, अभिभावक, मानव अधिकार समूहके सदस्यलगायत स्थानीयहुकनके उपस्थिति रहे ।
नाटकमे बालबालिकाहुक्रे शिक्षाके महत्व, शिक्षित परिवार ओ अशिक्षित परिवार बीचके फरक, छाइहुकनहे बिद्यालय नैपठैलेसे ओइने भविस्यमे पैना दुःख पीडा झल्कैना प्रयास करल रहे ।
नाटक धर्म ओ संस्कारके नाममे बालिकाहुकनके छोटे उमेरमे विवाह करना, छाइहे विद्यालय पठैले देउता रिसाके अनिष्ठ हुइना जैसिन कुसंस्कार अभिफेन समाजमे रहल ओरसे अइसिन मेरिक नाटकसे जनचेतना जागृत कराइ परना विद्यालयके प्रधानाध्यापक रोमाकान्त उपाध्याय आग्रह करलैं ।
१५ जाने पात्र रहल नाटकमे बालबालिका, विद्यालय, शिक्षक, शिक्षित परिवार, अशिक्षित परिवार, संघरिया, प्रहरीलगायतके विद्यार्थी भर्ना अभियानहे सफल परना हुइना मेरिक भूमिका झल्कनामेरिक कथा प्रस्तुत करले रहे ।
अस्टेक इन्सेकसे लालझाडी गाउँपालिका–१, नैरंगास्थित शारदा राष्ट्रिय माध्यमिक विद्यालयमे गठित बाल अधिकार चेतना समूहके सडक नाटक टोलीसे लागू औषध दुव्र्येशनीसे समाजमे परल असर ओ न्यूनीकरणमे सरोकारवालाहुकनके भूमिका विषयमे सडक नाटक तयार पारके वडा नम्बर १ स्थित रमाईलो चोकमे प्रदर्शन करले बा ।
नाटकमे बालबालिकाहुक्रे लागूऔषध दुव्र्येशनीसे समाजमे परल नकारात्मक असर ओ रोकथामके लाग सरोकारवालाहुकनके भुूमिका झल्कैना प्रयास करल रहे ।
शारदा राष्ट्रिय माध्यमिक विद्यालयके शिक्षक लोकराज भट्ट पाछेक समयमे लालझाडी गाउँपालिका लागूऔषध ओसारपसार तथा सेवन करना ट्रान्जिट प्वाईन्ट बनल ओरसे अइसिन मेरिक नाटकसे समाजमे सकारात्मक सन्देश प्रवाह करल बटैलैं । नाटकमे १६ जाने पात्र रहल रहैं ।
