कैलारीमे जेठ ३ ओ ४ गते बाल भेला कैना
पहुरा समाचारदाता
हसुलिया, ३० बैशाख । कैलालीके कैलारी गाउँपालिकामे यिहे अइना जेठ ३ ओ ४ गते बाल भेला हुइना बा ।
कैलारी गाउँपालिका महिला तथा बालबालिका शाखाके आयोजनामे बाल कल्याण संघ टीकापुरके सहकार्यमे शुकके रोज स्थानीय बाल अधिकार समितिके बैठकसे उ निर्णय करल हो ।
गाउँपालिका उपाध्यक्ष तथा स्थानीय बाल अधिकार समितिके अध्यक्ष भगवतीकुमारी चौधरीके अध्यक्षतामे हुइल बैठकसे पालिका अन्र्तगत सक्कु वडासे छनौटसे कैके २५ जाने बालबालिका, अन्य सरोकारवालाहुकनहे सहकार्यमे बाल भेला कैना निर्णय हुइल बाल कल्याण संघ टीकापुरके फिल्ड अधिकृत परशुराम चौधरी बटैलै । दुई दिनसम हुइल बाल भेलामे बाल अधिकार, नीति तथा योजना तर्जुमालगायत टमान विषयबस्तुबारे जानकारी डेना उहाँ बटैलै ।
ओस्टेक करके बालबालिकाहुकनके घटना व्यवस्थापन कैना प्रयोजनके लाग वल्र्ड भिजन ओ बाल कल्याण संघसे कैलारी गाउँपालिकाहे एक थान ल्यापटप हस्तान्तरण कैगिल बा ।
बाल कल्याण संघसे कैलारीके वडा नम्बर ८ मे कार्यक्रम करटी रहल बा । कार्यक्रमके वडका पहुना गाउँपालिका अध्यक्ष राजसमझ चौधरी सक्कु वडाहे समेट कैना आग्रह करलै । उहाँ कहलै, सक्कु वडामे समेटके कार्यक्रम कैलेसे पालिकाफे सहयोग ओ कार्यक्रम बजेटबारे जानकारी करैलेसे पालिका अपन रातो किताबसे उल्लेख करेसेकी ।’
कार्यक्रममे गाउँपालिका उपाध्यक्ष तथा स्थानीय बाल अधिकार समितिके अध्यक्ष भगवतीकुमारी चौधरी बाल अधिकारके लाग पालिकासे टमान कार्यक्रम करल बटैली । समितिसे बैठकसे आर्थिक बर्ष २०८०÷०८१ के लाग बालबालिकाहुकनके संरक्षण ओ विकासके लाग बजेट तथा कार्यक्रम विनियोजन करके कार्यक्रम लागु कैना निर्णय हुइल बा ।
बैठकसे कैलारी–४ अन्र्तगतके २ जाने संरक्षण विहिन बालबालिकाहुकनके सन्दर्भमे व्यवस्थापन करेक लाग सामाजिक विकास मन्त्रालय ओ राष्ट्रिय बाल कल्याण परिषदसंग सहकार्य करके व्यवस्थापन कैना, कैलारी गाउँपालिका अन्र्तगतके बाल कल्याण अधिकारीहे लिखित कार्यविवरण सहितके जिम्मेवारी डेना निर्णयफे कैगिल बा । कार्यक्रममे समितिके सदस्य रहल प्रमुख प्रशासकीय अधिकृत विरबहादुर ऐर, शिक्षा शाखा प्रमुख गणेश प्रसाद मिश्र, महिला तथा बालबालिका शाखा प्रमुख बालकुमारी चौधरी, इलाका प्रहरी प्रमुख राजेन्द्रसिंह कार्की, स्वास्थ्य शाखाके अनिता चौधरी, विद्यार्थी बालिका सिन्धु चौधरी, बाल कल्याण संघ टीकापुरके फिल्ड सुपरभाइजर सोनुराम चौधरी, रोजगार संयोजक निता भण्डारीलगायतके सहभागिता रहे ।
