मुक्तकमैयनहे जग्गा केल नाही शिक्षाफे डेहे पर्नामे जोड
पहुरा समाचारदाता
कञ्चनपुर, १ जेठ । मुक्त कमैयाहहुकनहे जग्गा केल नाही शिक्षामे ढेर जोर डेहे पर्ना बाट कृष्णपुर नगरपालिकाके नगर उपप्रमुख द्रोपति राना बटैले बटी ।
मुक्त कमैया समाज कञ्चनपुरसे सोम्मारके रोज आयोजना करल मुक्त कमैया पुनस्र्थापनाके लाग पालिकास्तरिय अन्तर सम्वाद कार्यक्रमके वडका पहुना रहल उहाँ उ बाट बत्वाइल हुइट । मुक्त कमैयाहुकनके हरेक मागप्रति अपने सकारात्मक रहल समेत उहाँ बटैली ।
ओस्टेक करके कार्यक्रमके विशिष्ट पहुना कृष्णपुर नगरपालिका वडा नं. ४ के अध्यक्ष धर्मबहादुर सिंह मुक्त कमैयामे चेतनाके अभिबृद्धि ओ सीपमुलक तथा बौद्धिक विकासके लाग कार्यक्रम तर्जुमा करे पर्ना आवश्यकता रहल बटैलै । मुक्त कमलरीके लाग अपने डेढ लाख बजेट समेत छुट्याइल उहाँ बटैलै ।
कमैया महिला जागरण समाज नेपालके केन्द्रिय सदस्य रमा चौधरी अभिनफे मुक्त कमैयाहुक्रे रोजगार, शिक्षा लगायतके सेवा सुविधासे वञ्चित हुई परल बटैली । सरकारसे डेहल पाँच कठ्ठा जग्गामे बर्षभर खान नइपुग्न, कुछ व्यावसायिक रुपमे कारोबार करे खोजेबेर बैंकसे धितो समेत नइधारडेना समस्या रहल उहाँ बटैली ।
कार्यक्रम मुक्त कमैया समाज कञ्चनपुरके उपाध्यक्ष जगनी डंगौराके सभापतित्वमे हुइल रहे । कार्यक्रमके स्वागत मुक्त कमैया समाज कञ्चनपुरके सचिव बुधिराम चौधरी करल रहिट कलेसे सञ्चालन दानसिंह डंगौरा करल रहिट ।
ओस्टेक करके कञ्चनपुरके पुर्नबास नगरपालिकामेफे मुक्त कमैया पुनस्र्थापनाके लाग पालिका स्तरिय अन्तर सम्वाद कार्यक्रम सोम्मार सम्पन्न हुइल बा । मुक्त कमैया समाज कञ्चनपुरके अध्यक्ष रामप्रसाद रानाके सभापतित्वमे ओ पुनार्वास नगरपालिकाके नगर प्रमुख तोयप्रसाद शर्माके प्रमुख आतिथ्यमे निम्जल कार्यक्रममे विशिष्ट पहुना वडा नं.६ के अध्यक्ष नेत्रसिह लामा रहल रहिट ।
कार्यक्रमके प्रमुख अतिथि नगर प्रमुख शर्मा मुक्त कमैयाहुकनके जिविकोपार्जनके लाग आयआर्जन तथा सीपमुलक कार्यक्रम सञ्चालन कैना ओ मुक्त कमैया पुनस्र्थापना कार्यविधि २०७९ नगर सभामे पेश कैना प्रतिवद्धता जनैले बा ।
