गोदावरीके किसानन्हे घेँट्रु वितरण

पहुरा समाचारदाता
धनगढी, ३ जेठ । कैलाली जिल्लाके गोदावरी नगरपालिका–६ बडेहाके २७ जाने किसानन्हे घेँट्रु वितरण करल बा । बुधके एक कार्यक्रमके बीच सुदूरपश्चिम प्रदेश सरकारके पुर्व पुर्वधार विकास राज्यमन्त्री चुन कुमारी चौधरी किसानन्हे घेँट्रु वितरण करल हुइटी ।

उहाँ महिलाहुक्रनके आर्थिक सशक्तिकरण करक लाग घेँट्रु वितरण करल बटैली । उहाँ डटरघाट पुल पुलेसासँगे कृषिके कार्यक्रममे फेन अपने जोड डेटी आइल बटैली । उहाँ जबसम विपन्न समुदाय आर्थिक रुपमे सम्वृद्ध नैहुइही तबसम सामाजके विकास नैहुइना बटैली ।

‘इ कार्यक्रम क्षणिक समयके लाग नैहो । अब्बे वितरण करल घेँटरुनहे बह्रापौह्राके काल्हके दिनमे बरवार कृषि फर्मके रुपमे संचालन करे सेकजाइ’ उहाँ कहली‘अब्बे २ ठो घेँट्रु लेहलहुक्रे काल्हके दिनमे घेँट्रु उत्पादन कैके बेचे सेक्नहा हुइ परल ।’
कार्यक्रममे भेटेनरी अस्पताल तथा पशु सेवा विज्ञ केन्द्र कैलालीके प्राविधिक महेश भट्ट कार्यक्रम संचालन कैनाके मुख्य उद्देश्य पाछे परल समुदायके आयआर्जन कैना रहल बटैलै ।

उहाँ कार्यक्रम अन्तरगत तालिम फेन डेना बटैलै । कार्यक्रमके लाग ४ लाख बजेट विनियोजन करल उहाँ बटैलै । भेटेनरी अस्पताल तथा पशु सेवा विज्ञ केन्द्र कैलालीके आर्थिक सहयोगमे संचालिन कार्यक्रमके स्थानीय सुवर पालन किसान समुहमार्फत संचालन करल हो । जौन अन्तरगत २७ किसानहे ५९ ठो घेँट्रु वितरण करल विपना चौधरी बटैली ।

भेटेनरी अस्पताल तथा पशु सेवा विज्ञ केन्द्र मार्फत उक्त वडामे २ समुह मार्फत १५० ठो घेँट्रु वितरण कैना कार्यक्रम रहल बा । बाकी घेँट्रु कुछ दिनमे जंगली बंगुरपालन किसान समुह मार्फत वितरण कैना भेटेनरी अस्पताल तथा पशु सेवा विज्ञ केन्द्र कैलालीके प्राविधिक भट्ट बटैलै ।