थारु परिकार संरक्षणके लाग बसेरा होटल संचालन

पहुरा समाचारदाता
धनगढी, ३ जेठ । थारु समुदायके सक्कु परिकार संरक्षणके लाग कैलालीके धनगढीमे बसेराके उदघाटन कैगिल बा ।

धनगढीके ५ जाने युवाहुकनके संयूक्त लगानीमे स्थापना हुइल बसेराके होटलके उदघाटन आज एक कार्यक्रमके बिच पर्यटन विज्ञ सञ्जय चौधरी ओ होटल व्यवसायी संघ कैलालीके अध्यक्ष केशवदत्त पाण्डे करल रहिट । उदघाटन कार्यक्रममे बोेल्टी पर्यटन विज्ञ सञ्जय चौधरी कहलै, पर्यटक भारी भारी भवन, टवार हेरे नई अइठै । ओइनहे गन्तव्य धार्मिक ओ सांस्कृतिक सम्पदा अवलोकन हो । जौन बसेरा होटलमे रहल बा ।

सञ्चालक प्रदीप कुमार चौधरी ढिक्रि, अन्दीके भात, कचरिक बरिया, थारु आलु, सुतही, घोगि, लोकल मुरगी शिकारलगायत थारु समुदायके सक्कु परिकारके व्यवस्था करल बटैैलै ।

‘थारु समुदायमे थारु परिकार खाइक लाग टिहुवार अशरा लागे पर्ना अवस्था बा’ उहाँ कहलै ‘थारु परिकार सदा पाई परठ कना उद्देश्यसे बसेरा स्थापना करल हुई ।’

यहाँ परम्परागत शैलीमे खैना व्यवस्था करल बा । थारु हस्तकला, लोप हुइटी गैेल परिकार, पोशाकफे बिक्रि वितरण व मिनि थारु सग्राहलयके स्थापना कैना तयारी हुइटी रहल चौधरी बटैलै ।