पालिका स्तरीय अनुगमन समितिसे टमान योजनाके अनुगमन

पहुरा समाचारदाता
हसुलिया, ३ जेठ । कैलारी गाउँपालिकाके टमान वडामे संचालन हुइल योजनाके गाउँपालिकास्तरीय अनुगमन समितिसे बुधके रोज अनुगमन कैगिल बा ।

गाउँपालिका स्तरीय अनुगमन समितिके संयोजक तथा कैलारी गाउँपालिकाके उपाध्यक्ष भगवतीकुमारी चौधरीके नेतृत्वमे टमान वडामे संचालित योजनाके स्थल अनुगमन कैगिल हो ।

अनुगमन समितिसे कैलारी गाउँपालिका वडा नम्बर ९ मे प्रधानमन्त्री रोजगार कार्यक्रम अन्र्तगत सिमराना गाउँके भरताल जंगल हुइटी उर्मी निकरना गौकनरी नालासम डगर पटानी ओ मर्मतके अनुगमन कैगिल बा ।

अनुगमन समितिसे वडा नम्बर ७ स्थित तीन विद्यालयके कक्षाके अनुगमन कैगिल समिति संयोजक भगवतीकुमारी चौधरी बटैली । समितिसे पशुपति शिक्षा मन्दिरमे अनुगमन करटी प्रअहे विद्यालयके पर्खाल निर्माण, बोर्ड निर्माण नइहुइल, विद्यार्थीनहे बजारके खाजासेफे घरसे खाजा नन्ना, ओ खाजा खैना ठाउँके व्यवस्थापन कैना सुझाव डेहल उहाँ जनैली ।

राष्ट्रिय आधारभूत विद्यालय बसन्ताके कक्षा ७ ओ कक्षा ८ के अनुगमन करल बा । यहाँ विद्यार्थीके नाउँ ओ अभिभावकके नाउँ, मोवाइल नम्बरफे धारल बा । जनता आधारभूत विद्यालय रामपुरके कक्षा ३ ओ कक्षा ५ अनुगमन कैगिल बा । यहाँ विद्यार्थी कम डेखल ओरसे उपस्थिति बह्रैना सुझाव डेहल बा । ओस्टेक करके राष्ट्रिय मावि भुइयाफाँटाके कक्षा ६, ९ ओ १० के अनुगमन कैगिल बा । यहाँ विद्यार्थीनहे नियमित विद्यालय अइना सुझाव डेहल उहाँ बटैली । वडा नम्बर ७ स्थित प्रतिक्षालय निर्माणके अनुगमन कैगिल बा । यहाँ काम सम्पन्न हुइल बा ।

समितिसे कैलारी–७ स्थित जनता आधारभूत विद्यालय भवन मर्मत योजनाके अनुगमन करले बा यहाँ काम सम्पन्न हुइल बा । गाउँपालिका ओ विल्डअनके साझेदारीमे रामपुरमे रहल जनता आधारभूत विद्यालयके तीन कोठे भवन निर्माणके अनुगमन कैगिल बा । निर्माण कार्य जारी रहल भवनके छट ढलानके काम बाँकी रहल ओ काम निरन्तर रहल बा ।

वडा नम्बर ७ चन्द्रीका चौधरीके घर लग्गे कल्भर्टसे रामपुर क्लव घरसम सडक स्तरोन्नती माटी पटानीके काम सम्पन्न हुके ग्राभेल डारल डेखल बा । यहाँ ग्राभेल तत्काल पैmलाके उ योजना गाउँपालिकासे तोकल समयमे सम्पन्न कैना समितिसे सुझाव डेहल बा । वडा कार्यालयसे रेन्जपोष्ट हुइटी हुलाकी सडक बसन्तासम सडक ग्राभेलके अनुगमन करल बा । यम्ने माटी डारल मने ग्राभेलके काम बाँकी रहलओरसे काम समयमे सम्पन्न कैना सुझाव डेहल बा ।

राष्ट्रिय मावि भुइयाँफाँटाके भवन निर्माणके अनुगमन करल बा । विद्यालयके फर्निचर ओ भवनके रंगरोगन बाहेक काम सेकल बा । यहाँ फर्निचर ओ रंगरोगनके काम समयमे सम्पन्न निर्देशन समितिके संयोजक बटैली ।

समितिसे वडा नम्बर ९ स्थित रौराबाबा विद्युत सहकारी भवन निर्माणके अनुगमन करल बा । वडा–८ स्थित लक्ष्मी माविके गेट निर्माण, राष्ट्रपति शैक्षिक सुधार कार्यक्रम अन्र्तगतके भवन निर्माणके अनुगमन करल बा । वडा नम्बर २ स्थित बसौटी स्वास्थ्य चौकीके अनुगमन कैगिल बा । वडा नम्बर ३ स्थित सोहनपुरसे भारतके सिमनासम पाँच लाखके ग्राभेलके अनुगमन करल बा ।

अनुगमनमे समितिके संयोजक भगवतीकुमारी चौधरी, पूर्वाधार विकास संयोजक प्रेमबहादुर चौधरी, सदस्य सुनिला चौधरी, योजना शाखा प्रमुख सन्तोषकुमार चौधरी, रोजगार सहायक इन्द्रश्याम चौधरी, स.ई सुनिल चौधरी, सं ई रन्जितकुमार कठरिया रहल रहिट ।