जनचेतनामुलक सडक नाटक प्रदर्शन
पहुरा समाचारदाता
कञ्चनपुर, १३ जेठ । अनौपचारिक क्षेत्र सेवा केन्द्र (इन्सेक) से लालझाडी गाउँपालिका–२ शंकरपुरस्थित भानु माध्यमिक विद्यालयमे गठित बाल अधिकार चेतना समूहके सडक नाटक टोलीसे लागु औषध दुव्र्यसनीसे समाजमे परटी रहल असर ओ न्यूनिकरणमे सरोकारवालाहुकनके भुमिका विषयमे सडक नाटक प्रदर्शन करले बा ।
मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहसे सडक नाटक प्रदर्शन करल हो । सडक नाटक प्रदर्शनमे शिक्षक, बिद्यार्थी, अभिभावक, मानवअधिकार समुहके सदस्यलगायत सयौंके संख्यामे स्थानीयके उपस्थिति रहे ।
सडक नाटक प्रदर्शन कार्यक्रममे बालबालिकासे लागुऔषध दुव्र्यसनीसे समाजमे परटी रहल नकरात्मक असर ओ रोकथामके लाग सरोकारवालाहुकनके भूमिका झल्कैना प्रयास करल रहे । मानवअधिकार समुह लालझाडीके संयोजक सोमनाथ राना पछिल्का समयमे लालझाडी गाउँपालिका लागुऔषध ओसार पसार तथा सेवन करुइयाके ट्रान्जिट प्वाईन्ट बन्टी गैल ओरसे यैसिन खाले नाटकमार्फत समाजमे सकरात्मक सन्देश प्रवाह करलमे बालअधिकार चेतना समुहहे धन्यवाद ज्ञापन करलै । १३ जाने पात्र रहल सडक नाटकमे बालबालिका, बिद्यालय, शिक्षक, वडाअध्यक्ष, स्थानीय मदिरा व्यापारी, मदिरा सेवन करटी रहल संघरीया, प्रहरी लगायतके लागु औषध दुव्र्यसनी न्यूनिकरणमे हुई सेक्ना भूमिका झल्कन खालके कथा प्रस्तुत करल रहे ।
ओस्टेक अनौपचारिक क्षेत्र सेवा केन्द्र (इन्सेक) से लालझाँडी गाउँपालिका–२ शंकरपुर स्थित भानु माध्यमिक विद्यालयमे गठित बाल अधिकार चेतना समूहके सडक नाटक टोलीसे भर्खर सम्पन्न हुइल विद्यार्थी भर्ना अभियानके अवसर पारके विद्यालयसे बाहेर रहल बालबालिकाहुकनहे भर्ना करैना अभिभावकहुकनहे सचेट पर्ना उद्देश्यके साथ सडक नाटक तयार पारके लालझाडी गाउँपालिका वडा नम्बर २ के कञ्ज बजारमे प्रदर्शन करले बा ।
सडक नाटक प्रदर्शन कार्यक्रममे बालबालिकासे शिक्षाके महत्व, शिक्षित परिवार ओ अशिक्षीत परिवार विचके भिन्नता, छाइनहे विद्यालय नइपठाइलमे ओइने भविष्यमे पैना दुःख पीडा झल्कैना प्रयास करल रहिट । बालबालिकासे प्रदर्शन करल सडकनाटक हेरके धर्म ओ संस्कारके नाउँमे बालिकाहुकनके छोट उमेरमे भोज कैना जैसिन कुसंस्कार अभिनफे समाजमे व्याप्त रहल ओरसे यैसिन खाले नाटकसे जनचेतना जागृत कैना हुइल ओरसे बालबालिकाहुकनहे अभिन विषय वस्तुमे निखरके समुदायमे जनचेतना फैलैना विद्यालयके संरक्षक शिक्षक टेकराज जोशी आग्रह करलै ।
