कैलारीमे महिलाहुक्रे संचालन करलै कुटानी पिसानी उद्योग

पहुरा समाचारदाता
हसुलिया, १३ जेठ । कैलालीके कैलारी गाउँपालिका वडा नम्बर ५ सडकपुरमे महिलाहुक्रे कुटानी पिसानीके उद्योग संचालन करले बटै ।

करिब ५० लाख ढेर लगानीमे चेतनशिल महिला बहुउद्देश्यीय सहकारी संस्था लिमिटेडसे कुटानी पिसानीके उद्योगमे संचालनमे नानल हुइट । सहकारीसे ढेर प्रयासपाछे कुटानी पिसानी सम्बन्धी उद्योग संचालनमे नानल हो ।

उ उद्योगके उदघाटन कैलारी गाउँपालिकाके अध्यक्ष राजसमझ चौधरी शुकके रोज एक कार्यक्रमके विच करल रहिट । कार्यक्रममे बोल्टी उहाँ महिलासे संचालन करल योजना उद्योग सफल हुइल कहटी यिहीहे पालिकामे ब्राण्ड बनाके लैजैना उहाँ आग्रह करलै । महिलासे सचालन करल उद्योगमे यहाँके स्थानीय रोजगारी पैनाके साथे यी उद्योगसे उत्पादन करल खाद्य उत्पादक बस्तु यिहे ठाउँमे बजारमे खपट हुइसेक्ना बटैलै ।

वडा नम्बर ५ वडा अध्यक्ष विष्णु प्रसाद चौधरी यी उद्योग संचालनके लाग २०७४ सालसे प्रक्रिया सुरु करल बटैलै । उद्योग संचालनके लाग पालिकासे २८ लाख ओ प्रदेश सरकारसे ४ लाग बजेट सहयोग करल उहाँ बटैलै ।

कैलारी गाउँपालिका महिला तथा बालबालिका शाखाके प्रमुख बालकुमारी चौधरी अब्बे खाद्य बस्तुमे मिसावट ढेर रहल कहटी गुणस्तरमे ध्यान डेना बटैली । समुह बचतसे सुरुवाट हुइल चेतनशिल महिला बहुउद्देश्यीय सहकारी संस्था लिमिटेड अब्बे भारी फडको मारल कहटी यी उद्योगसे उत्पादन हुइना बस्तु जिल्ला भर पुगाइ मजा हुइना बटैली । उद्योग संचालनसेफे टिकैना ओ निरन्तरता डेना आवश्यक रहलफे उहाँ बटैली ।

कार्यक्रम चेतनशिल महिला बहुउद्देश्यीय सहकारी संस्था लिमिटेडके अध्यक्ष हिरा चौधरीके अध्यक्षतामे हुइल रहे । उहाँ सहकारीसे केरा खेती, तरकारी, बाख्रापालन, कुखुरा पालनमे सहयोग करल बटैली । कार्यक्रमके संचालन सहकारीके सह व्यवस्थापन तिरथ चौधरी ओ स्वागत मन्तव्य सहकारीके उपाध्यक्ष सुशिला चौधरी करल रहिट ।

उद्योग उदघाटन कार्यक्रममे कृषि शाखाके प्रमुख मैया चौधरी, कृषि शाखाके बसन्ती चौधरी, धनगढी उपमहानगरपालिका–१९के वडा अध्यक्ष बाँधुराम चौधरी, वडा नम्बर १४ के अध्यक्ष माधव राना, सहकारीके कोषाध्यक्ष कृष्णा चौधरी, सचिव कृष्णा चौधरी, सहकारीके शेयर सदस्यहुकनके सहभागिता रहे ।