कैलारीमे निशुल्क स्वास्थ्य शिविर
पहुरा समाचारदाता
हसुलिया, २० जेठ । कैलाली जिल्लाके कैलारी गाउँपाालिका स्थित हसुलियामे शनिच्चरके रोज एक दिने निशुल्क स्वास्थ्य शिविर संचालन हुइल बा । कैलारी गाउँपालिकासंगके सहकार्यमे नवजीवन सेवा संघ तथा माया मेट्रो अस्पताल धनगढीके आर्थिक तथा प्रविधिक सहयोग निशुल्क स्वास्थ्य शिविर संचालन हुइल हो ।
उ शिविरके उदघाटन कैलारी गाउँपालिकाके उपाध्यक्ष भगवतीकुमारी चौधरीके वडका पहुनामे हुइल रहे । उदघाटन कार्यक्रममे सम्बोधन करटी उहाँ स्वास्थ्य शिविरसे ढेर जाने टमान मेरिक सेवा लेना मौका पाइल बटैली ।
कार्यक्रम संचालन कैलारी गाउँपालिका स्वास्थ्य शाखाके प्रमुख नरेश कुमार चौधरी शुभकामना मन्तव्य आयोजक संस्था नव जीवन सेवा संघके अध्यक्ष शंकर चन्द करल रहिट ।
शिविरमे हुइना सेवा ओ माया मेट्रो अस्पतालके बारेमे जानकारी डा. रविन्द्रदेव भट्ट करल रहिट । शिविरमे आठ विशेषज्ञ डाक्टर डा. डिआर कँडेल, डा. रविन्द्र देव भट्ट, डा. पुजन पन्त, डा. सुलोचना दाहाल, डा. खगेन्द्र धामी, डा. विरेन्द्र भण्डारी, डा. उपेश शर्मालगायतके टिमसे सेवा डेहल गाउँपालिका स्वास्थ्य शाखाके प्रमुख नरेशकुमार बटैलै ।
शिविरमे सामान्य चिकित्सा सम्बन्धी विशेषज्ञसे स्वास्थ्य परिक्षण तथा जाँच, स्त्री तथा प्रसुती रोग सम्बन्धी विशेषज्ञसे स्वास्थ्य परिक्षण तथा जाँच, वरिष्ठ हाडजोर्नी तथा नसारोग सम्बन्धी विशेषज्ञसे स्वास्थ्य परिक्षण तथा जाँच, बालरोग विशेषज्ञसे स्वास्थ्य परिक्षण तथा जाँच तथा परामर्श सेवा, वरिष्ठ नाक, कान तथा घाँटी रोग विशेषज्ञसे स्वास्थ्य परिक्षण तथा जाँच ओ रोगके प्रकृती अनुसार चिकित्सकसे सिफारिस करल औषधि निःशुल्क वितरण, परामर्श सेवा डेहल उहाँ बटैलै ।
