महिलावादी क्षमता विकास तालिम सम्पन्न
पहुरा समाचारदाता
धनगढी, २४ जेठ । महिलावादी क्षमता विकास तालिम सम्पन्न हुइल बा ।
महिला जागरण तथा विकास केन्द्र ओ ओरेक नेपालके संयुक्त आयोजनामे धनगढीमे तालिम आयोजना हुइल रहे । सातदिने तालिमके सहभागीहुक्रनहे तालिमसे अपनेहुक्रे ढेरकुछ सिकल बटैले बाटै ।
कैलारी गाउँपालिकाके कलसी चौधरी तालिमसे आपनमे ढेर कुछ परिवर्तन पाइल बटैली । उहाँ तालिमसे अपने आपहे फेन चिन्हगैलके साथे गाउँघर टोल समाज लगायतके व्यक्तिहुक्रनहे हेर्ना दृष्टिकोणमे फेन परिवर्तन आइल बटैली ।
उहाँ तालिमसे क्षमता विकाससे लेके नेतृत्व लगायत विपद्के बेला गाउँघरके स्थानीय ओ स्थानीय सरकारसे समन्वय सहकार्य कैके आघे बह्रे पर्ना समेत सिखे पैना मौका पाइल बटैली ।
ओस्टके तालिमके औरे सहभागी भीमदत्त नगरपालिका कञ्चनपुरके जानकी जोशी तालिमसे विपद् व्यवस्थापन, विपद्बारे प्रदेश तथा स्थानीय स्तरसे बनाइल नीति तथा कार्ययोजनाके बारेम जानकारी पाइल बटैली ।
महिला जागरण तथा विकास केन्द्रके प्रसन्न राउत पितृसत्तात्मक सोचहे परिवर्तन कैना, महिलावादी नेतृत्व विकास ओ संस्थागत विकासके लाग तालिम आयोजना करल बटैलै ।
ओस्टके उहाँ तालिमसे पाँच वर्षे रणनीतिक कार्ययोजना बनाके कार्यान्वय ओ स्थानीय सरकारहे जवाफदेही बनाइक लाग फेन तालिमके उद्देश्य रहल बटैलै ।
ओरेक नेपालके प्रभा पौडेल तालिमसे महिलाहुक्रनहे नेतृत्वदायी भूमिकामे पुगैना सहयोग पुग्ना बटैली । उहाँ स्थानीय सरकारमे महिलाके पहुँच, विपद् व्यवस्थापन समितिमे फेन महिलाहुक्रनके प्रतिनिधित्व सुनिश्चिताके लाग फेन सहयोग पुग्ना बटैलै ।
तालिममे कैलालीसे टीकापुर, भजनी ओ कैलारी गाउँपालिका ओ कञ्चनपुरसे भीमदत्त नगरपालिका ओ दोधारा चाँदनी स्थानीय तहके २५ जनहनके सहभागिता रहल ओरेक नेपाल कैलालीके कार्यक्रम अधिकृत गीता चौधरी जानकारी डेली ।
तालिममे ओरेक नेपालके अध्यक्ष रेणु अधिकारी, प्रभा पौडेल, ओरेक कार्यसमिति सदस्य संगीता अधिकारी, महिला जागरण तथा विकास केन्द्रके अध्यक्ष अनिता श्रेष्ठ ओ सुदूरपश्चिम सामाजिक विकास मन्त्रालय महिला शाखा प्रमुख जयन्ती गिरी लगायत प्रशिक्षण डेहल रहिट ।
