असार १० गतेभिटर व्यवसाय दर्ता ओ नविकरण कैना निर्देशन
पहुरा समाचारदाता
हसुलिया, २५ जेठ । कैलाली जिल्ला कैलारी गाउँपालिकाके टमान वडामे रहल बजारके अनुगमन कैगिल बा ।
कैलारी गाउँपालिकाके उपाध्यक्ष भगवतीकुमारी चौधरीके संयोजकत्वमे वडा नम्बर ९, ८ ओ २ मे रहल मुख्य–मुख्य बजारके अनुगमन कैगिल हो । अनुगमनके क्रममे ढेर मापदण्ड अनुसार संचालनमे नइआइल ओरसे असार १० गतेभिटर व्यवसाय दर्ता ओ नविकरण कैना निर्देशन डेगिल बा ।
अनुगमनके क्रममे खाद्यन्न पसलमे अखाद्यय बस्तु विक्री नइकैडेना, किराना पसलमे मिति गुजरल सामान विक्री नइकैना, ओ औषधी पसलमे मिति ओराइल डबाई विक्री नइकैना निर्देशन डेहल गाउँपालिका प्रवक्ता दिपेन्द्र बहादुर बम बटैलै । अनुगमनके क्रममे सक्कु वडामे टमान व्यवसायीसे दर्ता विना व्यवसाय संचालन करल भेटागिल बा,’ प्रवक्ता बम कहलै, ‘नयाँ व्यवसायीहुकन दर्ता करके व्यवसाय संचालन कैना ओ और नविकरण नइकरल व्यवसायहे नविकरण कैना, पालिकासे तोकल कर के दायरमे अइना आग्रह कैगिल बा ।
अनुगमनमे इलाका प्रहरी कार्यालय हसुलियाके सह इन्चार्ज विजय राना, पशु शाखाके प्रमुख सुर्य चौधरी, स्वास्थ्य शाखाके प्रमुख नरेश चौधरी, कैलारी उद्योग वाणिज्य संघके अध्यक्ष नेपालु चौधरी, गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम लगायत कर्मचारीके सहभागिता रहे । विफेक रोज तीन ठो वडामे अनुगमन बा कलेसे यी अनुगमन जारी रहना प्रवक्ता बम बटैलै ।
