कैलारीमे दुई महिने थारु लेहेंगा सिना तालिम निम्जल

पहुरा समाचारदाता
हसुलिया, २५ जेठ । कैलाली जिल्ला कैलारी गाउँपालिका महिला तथा बालबालिका शाखाके आर्थिक सहयोगमे महिलाहुनके आयआर्जनके लाग सीप विकास कार्यक्रम अन्र्तगत १८ जाने महिलाहुकनहे थारु लेहेंगा सिना तालिम डेडिल बा ।

कैलारी गाउँपालिका महिला तथा बालबालिका शाखाके आयोजनामे डेगिल तालिममे एक वडासे दुई जाने करके नौ वडाके १८ जाने महिलाहुकनके थारु लेहेंगा सिल्ना तालिम डेहल महिला तथा बालबालिका शाखाके प्रमुख बालकुमारी चौधरी बटैली ।
लोप हुइना अवस्थामे रहल मने लोक प्रियताभर बह्रटी गैल ओरसे संरक्षण प्रवद्र्धनके लाग लेहेंगा सिल्ना तालिम डेहल उहाँ बटैली । ओस्टेक तालिममे सहभागिहुकनहे अनुदानमे मेसिनफे उपलब्ध कराइल उहाँ जनैली । लेहेगा सिना तालिमपाछे आव डिडीबाबुहुक्रनके आय आर्जनसंगे आर्थिक शसक्तीकरणमे टेवा पुग्ना उहाँ बटैली । आर्थिक शसक्तीकरण हुइलेसे महिलाहुक्रे हिंसामे नइपर्ना उहाँ बटैली ।

सीप सिख्ले जहाँफे काम लागठ उहाँ कहली, सुदूरपश्चिम ओ लुम्बिनी प्रदेशमे यकर प्रचारप्रसार करे सेक्लेसे यिहे ठाउँसे मजा सप्लाई करले सेकजाई । कैलारीमे किने अइना ओ सिखे अइना मेरिक विद्यालयहस बनाई पर्नामे उहाँ जोर डेहल रही । यहाँ प्रशिक्षक उत्पादन करल उहाँ बटैली । सिपके सदुपयोग करलेले परनिर्भरतामे नइरहना उहाँ बटैली ।

तालिम समापन कार्यक्रमके वडका पहुना वडा नम्बर ५ के वडा अध्यक्ष विष्णुप्रसाद चौधरी संस्कृति संरक्षण कैना जरुरी रहल बटैलै । उहाँ कहलै, हम्रे अपनहे चाहल थारु पहिरन बाहेर नाने परल रहे । आब अपनही ठाउँमे बनाई सेक्ना हुइल बटी । हमार लगानी खेर नइजैना विश्वास बा ।’

उहाँ कहलै, ‘हमार संस्कृति, खानपान, पहिरन दिनदिने परिवर्तन हुके मौलिक खाना, परम्परागत संस्कृतिउप्पर प्रहार हुइटा । यिहीहे जोगाइक लाग यूवा पुस्ता अग्रसरता डेखाई परल ।’

कार्यपालिका मानबहादुर कुमालके अध्यक्षतामे हुइल कार्यक्रममे वडा सदस्य अनारकली चौधरी, भागुदास चौधरी, पवित्रादेवी परियार, चेतनशिल महिला बहुउद्देश्यीय सहकारी संस्था लिमिटेडके अध्यक्ष हिरा चौधरी लगायत मन्तव्य व्यक्त करल रहिट ।