पटुहियाके हत्या करुइया ससुरुवा ससुइया पक्राउ

पहुरा समाचारदाता
धनगढी,२८ जेठ । अपनही हत्या करके जिल्ला प्रहरी कार्यालय कैलालीमे पटुहिया हेराइल कहटी जिल्ला प्रहरी कार्यालयमे निवदेन डेहुइया कैलाली के गौरीगंगा नगरपालिका– १ गोप्काके ससुरुवा ससुइया पक्राउ परल बटै ।

गैल १८ गते रातके अन्दाजी ९ बजेक समयमे जिल्ला कैलाली गौरीगंगा नगरपालिका १ गोप्का स्थित अपने घरमे पटुहिया कविता बुढा भान्सा कोठामे रोटी पकाईबेर ससुरुवा डिल्ली सिंह बुढा पाछेसे मुरीमे काठीक फटठीले मारके हत्या करल रहिट ।
हत्या पश्चात डिल्लीसिंह बुढा ओ लहरी बुढा मिलके लाशहे डोकोमे डारके घरसे अन्दाजी ३ किलोमिटर दुरके गौरीगंगा–१ केदारेश्वर सामुदायिक वनमे लैजाके खोल्टा खोदके लाशहे गारल ओ लाशसंगे मृतकके रगत लागल कपडा, फरुवा, डोकोफे उहे खोल्टामे भाँठल रहिट ।

डिल्ली सिंह बुढा घटना ढाकछोप कैना अपनही हत्या करल पटुहिया कबिता बुढा हेराइल कहटी प्रहरी कार्यालयमे निवेदन डेके अपने जेठ १९ गतेसे २२ गतेसम कञ्चनपुर जिल्लाके बिचफाँटा आफन्तके घरमे बैठल रहिट ।

जेठ १८ गते साँझसे मोर पटुहिया बर्ष २७ के कौशी कना कबिता बुढा घरसे हेराइल कहिके जिल्ला कैलाली गौरीगंगा न.पा. १ गोप्का बैना डिल्ली सिंह बुढा जेठ १९ गते जिल्ला प्रहरी कार्यालय कैलालीमे निबेदन पेश करेबेर कबिता बुढाके खोज तलासके लाग हुँलिया परिपत्र कैना कार्य हुइल रहे ।

जेठ १९ गते डिल्लीसिंह बुढा हुँलिया निवेदन डेहल पश्चात ८ बर्षके नातीया डण्डीराज बुढासहित सम्पर्क बिहिन हुइल रहिट । जेठ २२ गते सम डिल्लीसिंह बुढा तथा कविता बुढा सम्पर्कमे नइआइलपाछे कबिता बुढाके लैहर भैया पराने बुढा ईलाका प्रहरी कार्यालय चौमालामे निवेदन डेहलमे घटना संकास्पद विल्गाके प्रहरी अनुसन्धान सुरु करल रहे । उहे क्रममे कबिता बुढाके हत्या करके जिल्ला कैलाली गौरीगंगा न.पा. वडा नं. १ केदारेश्वर सामुदायिक वन भिटर ८ फिट ४ ईन्च गहिराई रहल सुख्खा नालामे खोल्टा गारल अवस्थामे कबिता वुढाके शव फेला पारके घटनास्थल अनुसन्धान कार्य पुरा करके लाशहे शव परीक्षणके लाग सेती प्रादेशिक अस्पताल धनगढी नानल रहे ।

कविता बुढाके हत्यामे हुकान ससुइया लहरी बुढा ओ ससुरुवा डिल्लीसिंह बुढाके संलग्नता प्रारम्भिक चरणके अनुसन्धानसे विल्गाइल रहे । जेठ २३ गते कविता बुढाके डाडु रामबहादुर बुढा किटानी जाहेरी दरखास्त पेश करेबेर लहरी वुढाहे पक्राउ करके कैलाली जिल्ला अदालतसे म्यादथप अनुमती लेके थप अनुसन्धान कार्य प्रारम्भ करल बा ।

डिल्ली सिंह बुढाके खोजतलासके क्रममे निजके अन्तिम लोकेशन जेठ २२ गते ४ बजे कञ्चनपुर जिल्लाके परासनमे डेखल ओरसे तत्काल ओहोर ओर प्रहरी टोली परिचालन हुके अपन सम्पर्कमे आइल प्रतिबादी डिल्लीसिंह बुढाहे भगाके २० गते से २२ गतेसम कञ्चनपुर जिल्लाके बिचफाँटामे लुकाई छिपाई रख्न सहयोग कैना जयबिर बुढाहे २३ गते पक्राउ करल रहे ।

घटनाके मुख्य अभियुक्त डिल्लीसिंह बुढा जिल्ला कैलाली भजनी नगरपालिका वडा नं. ३ के नेपाल भारत सिमावर्ति ईलाकामे लुकिछिपी बैठल कना सूचनाके आधारमे प्रहरी खटके जेठ २७ गते पक्राउ करके दाखिला करल रहे ।

घटना अनुसन्धानके क्रममे कबिता बुढाके गोसिया अर्जुन बुढा छोटकी गोसिनीयाहे संग्गे लेके विगत १ बर्षसे भारतके ब्याङ्लोरमे बैठटी आइल बटै । घरे रहल कबिता बुढासंग हुकान सासुइया लहरी बुढा ओ ससुरुवा डिल्लीसिंह बुढाके झै–झगडा हुइना करल रहे ।

घटना पुर्वफे घरायसी झगडाके बिषयमे ईलाका प्रहरी कार्यालय चौमालामे जाके मेलमिलाप कैना करलमे जेठ १८ गते साँझ डिल्ली सिंह बुढा घरके काम नइकैना, अपने खुशी कैना कहिके निहु खोजेबेर बिवाद हुइल रहे ।