धार्मिकस्थल वनदेवी मन्दिर सरसफाई
पहुरा समाचारदाता
हसुलिया,२८ जेठ । कैलाली जिल्ला कैलारी गाउँपालिका वडा नम्बर १ मे रहल धार्मिक स्थल वनदेवी मन्दिर सरसफाई कार्यक्रम कैगिल बा ।
गाउँपालिका उपाध्यक्ष भगवतीकुमारी चौधरीके वडका पहुनामे हुइल कार्यक्रममे जनप्रतिनिधि ओ प्रहरी मिल्के बनदेवी मन्दिर सरसफाई कैगिल हो । ‘सामुदायिक प्रहरी–साझेदारी अवधारण अनुरुप’ अँटवारके रोज वनदेवी मन्दिर सरसफाई कार्यक्रम कैगिल बा ।
गाउँपालिकाके मुख्य धार्मिक क्षेत्रमे रुपमे रहल उ मन्दिरमे दैनिक सयौं दर्जनार्थी ओ पिकनिक खाई अउइयाके भीड लागठ । धार्मिक स्थलहे सफा सुधार धारे परठ कहटी उ क्षेत्रके अनुगमन तथा सरसफाई कैगिल उपाध्यक्ष बटैली । उहाँ कहली, वनदेवी मन्दिर क्षेत्रमे सरसफाईके कमी डेखल बा । यहाँ पुजा करे अइना, मनौटा करुइयाहुक्रे बलि देनाके साथे पिकनिकफे खैना करठ । मने यहाँ फोहर व्यवस्थापनके कमी विल्गाइठ । यी क्षेत्रहे सरसफाईमे धारेक लाग मन्दिर व्यवस्थापन समिति जागरुक हुई परल । पीकनिक खाई, बलि डेके खानपिन कैना करलपाछे निकरल फोहरके उचित व्यवस्थापन हुइल नइविल्गाइठ ।
पिकनिक खाई अउइयासे न्यूनटम शुल्क उठैलेसे उ रकमसे सरसफाई करे सेक्ना सुझाव डेहल बा, उपाध्यक्ष कहली अब्बे सरसफाई व्यवस्थापन समितिसे सरसफाईहे निरन्तरता डेलेसे अइना दिनमे पालिकासे सरसफाईके लाग कुछ बजेट छुत्याई सेक्ना उहाँ बटैली । वनदेवी मन्दिर आसपास संचालन हुइल पसलहे गाउँपालिकामे दर्ता कैनाफे उहाँ सुझाव डेहल रही ।
सरसफाइई कार्यक्रममे इलाका प्रहरी कार्यालय हसुलियाके प्रहरी नायव निरिक्षक राजेन्द्रसिहं कार्की, प्रहरी टोली, वडा अध्यक्ष, स्थानीय, महिला समाजसेवी, वुद्धिजिवि तथा टमान पार्टीके प्रतिनिधि लगायतके सहभागिता रहे ।
