कैलारीमे ९८.२६ प्रतिशतहे खोप
पहुरा समाचारदाता
हसुलिया, ३१ जेठ । कैलाली जिल्लाके कैलारी गाउँपालिकामे ९८.२६ प्रतिशत बालबालिका दादुरा रुबेला खोप लगाइल कैलारी गाउँपालिका जनैले बा ।
यिहे जेठ २५ गतेसे ३० गतेसम संचालन हुइल दादुरा रुबेला खोप अभियानमे गाउँपालिका भर ९ हजार ४ सय ६३ जाने बालबालिकामे खोप लगैना लक्ष्य लेहलमे ९ हजार २९९ (९८.२६ प्रतिशत) बालबालिकामे खोप लगाइल कैलारी गाउँपालिका स्वास्थ्य शाखाके प्रमुख नरेशकुमार चौधरी बटैलै ।
अभियानमे ६ महिनासे ५९ महिनासम २ हजार ७६९ जाने (९५.५४ प्रतिशत), ५ बर्षसे १५ बर्षसम ६ हजार ५३० (९९.४६ प्रतिशत) बालबालिकामे खोप लगैले बटै । खोप अभियानमे नौ वडा मन्से कौनो वडामे लक्ष्यसे ढेर जाने खोप सेवा लेले बटै ।
वडा नम्बर १ मनाउँ आधारभूत स्वास्थ्य केन्द्रमे ११ सय ६० जनहनमे खोप लगैना लक्ष्य रहलमे यहाँ १३ सय १७ जाने खोप लगैले बटै । वडा नम्बर २ बसौटी स्वास्थ्य चौकीमे ९ सय ६० लक्ष्य रहलमे ९ सय ३ जनहनमे खोप लगाइल बा । वडा नम्बर ३ हसुलिया स्वास्थ्य चौकीमे ८ सय ३२ लक्ष्य रहलमे ४ सय ५२ जाने, वडा नम्बर ४ के गाउँ आधारभूत स्वास्थ्य केन्द्रके ९८६ लक्ष्य रहलमे ९५४ जनहनमे खोप लगाइल बा ।
वडा नम्बर ५ पवेरा स्वास्थ्य चौकी १ हजार ६१ लक्ष्य लेहलमे १४ सय ८८ जाने सेवा, वडा नम्बर ६ बनकट्टा आधारभूत स्वास्थ्य केन्द्रमे ११ सय ३९ लक्ष्य लेहलमे ८९८ सेवा लेलै ।
वडा नम्बर ७ रतननपुर स्वास्थ्य चौकीमे १३ सय ५२ लक्ष्य रहलमे १२ सय ९०, वडा नम्बर ८ उदासीपुर प्राथमिक स्वास्थ्य केन्द्रमे एक हजार २३ लक्ष्म रहलमे ९५५ जाने खोप सेवा लेहल स्वास्थ्य शाखा प्रमुख बटैलै । ओस्टेक करके उहाँ वडा नम्बर ९ गदरिया स्वास्थ्य चौकीमे ९५० लक्ष्य लेहलमे एक हजार ३२ जाने सेवा लेले बटै ।
नेपालमे करिब १६ प्रतिशत बालबालिका खोपके कुछ मात्रा किल ओ करिब चार प्रतिशत बालबालिका एकठो फेन खोप नैलगैना करल सर्भेक्षणसे डेखाइल बा । नियमित खोप लगैना छुटल बालबालिकाहे लक्षित कैके प्रदेशभर साताव्यापी खोप अभियान सञ्चालन हुइल बा ।
स्थानीय, जिल्ला, प्रदेश तथा संघ बीच समन्वयके अभाव हुइल, खोप सेवाहे प्राथमिकता नइडेहल ओ दोहोरो बसाई, खोपके महत्व बारेमे टमान निकायसे जानकारी, प्रचारप्रसारमे कमीसे खोपमे ड्रप आउटके समस्या रहठ ।
