मेलमिलापकर्ताहुकनहे पुनर्तजागी तालिम
पहुरा समाचारदाता
हसुलिया, १ असार । कैलालीके कैलारी गाउँपालिकामे मेलमिलापकर्ता हुकनके दुई दिवसिय पुनर्तजागी तालिम डेगिल बा ।
कैलारी गाउँपालिका न्यायिक समितिके आयोजनामे नौ वडामे रहल मेलमिलाप केन्द्रके मेलमिलापकर्ताहुकनके तालिम देहल हो । तालिममे मेलमिलाप प्रक्रियाके सात चरणबारे, मुद्दाके प्रकार, मेलमिलाप कैना तरिकाबारे प्रशिक्षण डेगिल बा । कलेसे मेलमिलापके अभ्यासफे कैगिल बा ।
तालिम समापन कार्यक्रम कैलारी गाउँपालिका न्यायिक समितिके संयोजक तथा उपाध्यक्ष भगवतीकुमारी चौधरीके अध्यक्षतामे हुइल रहे । गाउँपालिकामे टमान मेरिक मुद्दा चाङ लागल बा, न्यायिक समिति संयोजक कहली ‘सम्बन्धित वडाके मुद्दा वडामे रहल मेलमिलाप केन्द्रमे पठाइल मने फैसाला नइहुके फेरसे न्यायिक समिति लौटना हुइल ओरसे मेलमिलापकर्ताहुकन सक्रिय बनाइक लाग पुनर्तजागी तालिम डेहल हो । उहाँ वडा–वडामे मेलमिलाप केन्द्रके मेलमिलापकर्ताहुकन सक्रिय हुइना आग्रह कहली ।
कार्यक्रमके प्रशिक्षक अधिवक्ता पुष्प विक्रम शाही विवाद हुइलेसे विनास हुइना मेलमिलापसे शान्ति स्थापना हुइना बटैलै । उहाँ कहलै, शब्द शब्दमे मन्त्र रहठ । पातपातमे औषधी रहठ । मेलमिलापकर्तासे मेलमिलाप प्रक्रियाके सात चरण प्रयोग करलेसे मुद्दाके समाधान करे सेक्जाई ।
कार्यक्रममे वडा नम्बर ४ के मेलमिलाप केन्द्रके संयोजक तिर्थ प्रसाद नेपाल, वडा नम्बर ७ के मेलमिलाप केन्द्रके मेलमिलाप कर्ता सरस्वती चौधरी मन्तव्य व्यक्त करटी तालिम पश्चात विवाद मिलैना सहजुल हुइना बटैलै ।
यिहीसे आघे शुकके रोज कैलारी गाउँपालिकाके अध्यक्ष राजसमझ चौधरी वडका पहुनामे कार्यक्रमके उदघाटन हुइल रहे । विवाद मिलैना मिलैना मेलमिलापकर्ताहुकनके भारी योगदान रहल उहाँ बटैले रहिट । कार्यक्रममे प्रशासकीय अधिकृत विरबहादुर ऐर, वडा नम्बर १ के अध्यक्ष धोजहरिपाल बोहरा, ४ नम्बरके वडा ठागुराम चौधरी, न्यायिक समिति सदस्य हरिद्वारी चौधरी, कार्यपालिका सदस्य सुन्दरी चौधरीलगायतके सहभागिता रहे । कार्यक्रमके संचालन अनिल चौधरी करले रहिट ।
