भल्मन्साके लाग ठोस कानून बनैनाः कानून मन्त्री सिंह

पहुरा समाचारदाता
धनगढी, २ असार । सुदूरपश्चिम प्रदेशके आन्तरिक मामिला तथा कानून मन्त्री पृथ्वीबहादुर सिंह प्रदेशमे ठोस कानून बनाके भल्मन्सनहे शक्ती प्रदान कैना मानसाय रहल बटैले बटै ।

आन्तरिक मामिला तथा कानून मन्त्रालय सुदूरपश्चिम प्रदेशके सहकार्यमे थारु कल्याणकारिणी सभा कैलालीके आयोजना ओ कैलारी गाउँपालिका स्तरीय बडघर भल्मन्सा समितिके आयोजनामे कैलाली जिल्लाके कैलाली गाउँपालिकामे शनिच्चरके हुइल बरघर, भल्मन्सा, चिराकी, गुरुवा, सोह्रिनियाहुकनके लाग एक दिने कानून तथा मानव अधिकार सम्बन्धी सचेतना कार्यक्रममे उहाँ बाट बत्वाइल हुइल रहिट ।
आन्तरिक मामिला तथा कानून मन्त्री सिंह बरघर, भल्मन्साहुकन कानूनी मान्यता डेहक लाग प्रदेश सरकार लागल बटैले बटै ।

उहाँ कहलै, बरघर, भल्मन्सा ऐन प्रदेश सरकारसे बनाई सेक्जाईठ की केन्द्रसे बनथ । ओकर लाग पहल जारी बा । यदि संघीय सरकारसे बनाइ कलेसे उ कानून देशभर लागु हुई । संघीय सरकार नइबनाई टे हम्र प्रदेशमे कानूनी प्रक्रियाम धालके विद्येयक ल्यानके कानूनी मान्यता डेब ।

सुदूरपश्चिम प्रदेश सरकार नीति तथा कार्यक्रममेफे बरघर, भल्मन्साहुकन समेट ओ शुकके ल्यानल ओ सार्वजनिक हुइलक २०८०÷८१ सालके बजेटमे यी कार्यक्रमहे समेटल मन्त्री सिंह बटैलै ।
कानून ओ मानव अधिकारके बारेमे कुछ जानकारी कराके सुसप्ट अवस्थामे रहल बरघर, भल्मन्सा, चिराकी, गुरुवा, सोह्रिनियाहुकनसे करटी आइल योगदानहे वैकल्पिक कानूनी प्रणालीमे धाल्के कानून संरक्षण डेना उहाँ बटैलै ।

अब्बेक अवस्थामे बहुट जाने कानूनबारे नइजन्ठै ओ कोई कानूनबारे पत्ता नइरहठ । जान अजानमे गल्टी हुइना करल बा । कानून नइजानके करल अपराधहे कानून छुट नइडेहठ मन्त्री सिंह कहलै ।
प्रहरी प्रशासन न्याय प्रदान करुइया निश्चित निकाय बटै मने गाउँघरमे ओकर वैकल्पिक प्र्रणालीके रुपमे भल्मन्सा, न्यायिक मुख्याहुक्रे, पटवारी सामान्य न्याय कैना, विवाद मिलैना अधिकार डेहे सेक्लेसे समाजसे अपराध घटी उहाँ कहलै ।

कार्यक्रमम कैलारी गाउँपालिकाके अध्यक्ष राजसमझ चौधरी कैलारी गाउँपालिकामे बडघर भल्मन्सा ऐन बनासेकल बटैलै । उहाँ कहलै, कैलारीमे बरघर, भल्मन्साहुकनके लाग टमान फेर कार्यक्रम कैगिल बा । पालिकासे भल्मन्साहुकनहे मासिक ६ रुप्या संचार खर्च कहिके व्यवस्था करल बा । पालिकामे ऐन बनल आब कार्यविधि बनैना उहाँ बटोइल ।

कार्यक्रमम थारु कल्याणकरिणी सभाके केन्द्रीय सदस्य प्रभातकुमार चौधरी, रामचरण चौधरी, आन्तरिक मामिता तथा कानून मन्त्रालयके निमित्त सचिव विश्वदिप बेस्रा, नेपाली काँग्रेस कैलालीके सभापति नारायणदत्त भट्टलगायत, बरघर, भल्मन्सा, चिराकी, गुरुवा, सोह्रिनिया, टमान वडाके वड अध्यक्षहुकनके सहभागिता रहे । कार्यक्रम थारु कल्याणकारिणी सभा कैलालीके कार्यवाहक सभापति माधव थारुके घरगोस्यामे हुइल रहे ।