दुर्घटनामे प्रदेश कानुन मन्त्री सिंह दम्पत्ती सहित तीनके मृत्यु
पहुरा समाचारदाता
धनगढी, ५ असार । धनगढीसे बझाङ जैना क्रममे गाडी दुर्घटनामे परके घाहिल हुइल सुदूर पश्चिमके कानुन मन्त्री पृथ्वी बहादुर सिंह दम्पत्ती सहित तीन जनहनके मृत्यु हुइल बा ।
प्रहरीके अनुसार मृत्यु हुउइयामे ५५ वर्षीय सिंह सहित ओहकान गोसिनीया ५० वर्षीया अमृता सिंह ओ ६५ वर्षीया भौजी जया देवी सिंह रहल बाटै । गाडी दुर्घटनामे परल मन्त्री सिंहके कोहलपुर मेडिकल कलेजमे ओहकान गोसिनीया अमृता ओ भौजी जयाके बझाङके देउरास्थित पोलिक्लिनिकमे मृत्यु हुइल हो ।
मन्त्री सहित पाँच जाने सवार गाडी मंगर दिनके करीव १ः४५ बजे बझाङके केदारस्यूँ गाँउपालिका–१ झारछडामे दुर्घटना हुइल रहे । गाडीके चालक ३५ वर्षीय धर्मराज जोशी ओ मन्त्रीके सुरक्षा गार्ड दीपक भण्डारी घाहिल हुइल बाटै । चालक जोशीके अवस्था मध्यम ओ प्रहरी सहायक हवल्दार भण्डारीके अवस्था गम्भीर रहल प्रहरी जनैले बा ।
स्थानीय बासिन्दाके अनुसार देउरा ओ बागथलाके सडक खण्डसे करीव ५० मिटर टरे गिरके मन्त्री सिंह चह्रल गाडी कच्याककुचुक हुइल रहे । धनगढीसे मन्त्री सिंहसंगे ओहकान छावा अभिषेक फेन बझाङ गैल रहिट । मने अभिषेक भर मन्त्रीके गाडीके पाछेक औरे गाडीमे सवार रहिट । स्कर्टिङमे रहल प्रहरी ओ औरे गाडीमे रहल अभिषेक सहितके टोली दुर्घटनाग्रस्त गाडीसे मन्त्री सहित सक्कु घाइतेहुक्रनहे निकारल रहिट ।
घट्नास्थलसे स्कर्टिङमे खटल प्रनानी सुशिल चन्द ठकुरीके टोलीसे उद्दार कैके सिंह सहित पाँचु जनहनहे देउरास्थित रितु पोलिक्लिनिकमे पुगाइल रहिट । जहाँ उपचारके क्रममे मन्त्री सिंहके गोसिनीया अमृता ओ भौजी जयाहे चिकित्सकहुक्रे मृत घोषणा करल रहिट ।
मन्त्री सिंह चह्रल सुदूरपश्चिम प्रदेश ०१–००१ झ ४८० नम्बरके जीप धनगढीसे बझाङ जैटी रहल बेला केदारस्युँ गाउँपालिकामे दुर्घटनामे परल रहे ।
