माग मुद्दा सम्बोधनके लाग आन्दोलित
पहुरा समाचारदाता
धनगढी, ५ असार । सुदूरपश्चिम प्रदेश सरकारसे आगामी आर्थिक बरसके बजेटमे अपागंता रहल व्यक्तिनके कौनो फेन सवाल नैसमेटल कहटी अपागंता अधिकार संघर्ष समिति आन्दोलनमे उत्रल बा ।
प्रदेश सरकारहे सुदूरपश्चिमके अपागंता रहल व्यक्तिहुक्रनके समस्या समाधान कैना टमान शिर्षकमे बजेट माग कैलेसे फेन कौनो सवाल सुनुवाई नैहुइल कहटी उहाँहुक्रे आन्दोलित बनल हुइट ।
उहाँहुक्रे पहिल चरणमे पत्रकार सम्मेलन कैटी प्रदेश सरकारहे अपागंता रहल व्यक्तिहुक्रनके बिषयमे पुनर्बिचार कैना आग्रह करले बाटै । अपागंता संघर्ष समितिके संयोजक भिम बहादूर शाह सुदूरपश्चिममे हरेक मेरके अपागंता रहल व्यक्तिहुक्रनके समस्या सम्बोधनके लाग सरकारसे बजेट माग कैलेसे फेन बजेट पिनियोजन नैहुइल बटैलै ।
हम्रे प्रदेशके मुख्यमन्त्री, सभामुख, सामाजिक विकास मन्त्री लगायत टमान मन्त्रीहुक्रनहे अपागंताके क्षेत्रके समस्या ओ सम्बोधन करे पर्ना बिषयबारे जानकारी कराइल रही, उहाँ कहलै “सम्बोधनके लाग प्रतिबद्धता फेन हुइल रहे मने अब्बे आके उ सवाल गोरसे कुच्लल् बा, हम्रहीनहे ढेर दुःख लागल बा, सरकारसे हम्रहीनहे अपमान करल महसुस हुइल बा, अपागंता रहल व्यक्तिहुक्रनके अधिकार कुच्लल् अनुभुती हुइल बा ।”
राष्ट्रिय अपागं महासघं सुदूरपश्चिम अन्तर्गतके ४२ ठो संस्थासे आन्दोलनमे एक्यबद्धता जनैले बाटै । उहाँहुक्रे संयुक्त रुपमे सघर्ष कैना जानकारी डेले बाटै । राष्ट्रिय अपागं महासघं सुदूरपश्चिमके अध्यक्ष मान बहादूर साउँदके अनुसार असार ८ गतेसम प्रदेश सरकार ओ प्रदेशसभाहे बजेट पुनरावलोकनके लाग अल्टिमेटम डेना, १० गते सकारे १० बजेसे शान्तिपुर्ण प्रदर्शन सहित प्रदेशसभा आघे अनिश्चितकालिन धर्ना बैठ्ना, प्रदेशके अस्थाई राजधानीभिट्टर बनल र्याम्प, सौचालय भत्कैना ओ ओत्र करलमे फेन माग सुनुवाई नैहुइलेसे असार १५ गतेसे अनिश्चितकालिन आमरण अनशन बैठ्ना कार्यक्रम रहल बा ।
राष्ट्रिय अपागं महासघं सुदूरपश्चिम प्रदेशके सचिव नन्दराज भट्ट टमान २९ बुँदे माग प्रदेश सरकारके सक्कु प्रतिनिधीहुक्रनहे बुझैलेसे फेन कौनो मुद्धाके सुनुवाई नैहुइल बटैलै । ‘हम्रे सककु मेरके समस्या उल्लेख कैके अपागंता रहल व्यक्तिहुक्रनके माग सक्कु जनहनठन रख्ली मने उ सुनुवाई नैहुइल’, उहाँ कहलै– ‘सुदूरपश्चिममे हम्रे अधिकार बिहिन हुइल बाटी, हम्रहीनहे प्रदेश सरकार नागरिक नैमानल ओहेमारे हमार मागमे सक्कु एक्यबद्धता होए कना चाहटी ।’
